Navarra
O Goberno de Navarra pon en marcha un ano máis unha campaña para fomentar a aprendizaxe do éuscaro entre persoas adultas
O Goberno de Navarra, a través de Euskarabidea, lanzou a campaña “Euskera ahora” para fomentar a aprendizaxe do éuscaro entre a poboación adulta, en colaboración con 34 entidades locais e euskaltegis. A iniciativa combina publicidade en medios físicos e dixitais, materiais en varias linguas e novos recursos en liña como a plataforma INGURA para estudar o idioma desde calquera lugar. Ademais, este curso increméntanse as axudas individuais ata 560 000 euros para facilitar a matriculación. A campaña busca ampliar a presenza do éuscaro e consolidar o seu uso na vida diaria da cidadanía.
Fonte: Gobierno de Navarra
O Concello de Pamplona subvenciona proxectos e actividades de promoción do éuscaro
O Concello de Pamplona repartiu 118 000 euros en subvencións entre 18 entidades sen ánimo de lucro para desenvolver 29 proxectos de fomento e normalización do éuscaro. As actividades, abertas á cidadanía e centradas no termo municipal, deberán mellorar o uso, prestixio e competencia lingüística entre novembro de 2024 e outubro de 2025. A concesión valorou a traxectoria das entidades, a calidade das propostas e o seu impacto na promoción inclusiva e innovadora da lingua.
Fonte: Uruñeko Udala
O Concello de Pamplona convoca o seu certame literario en éuscaro para autoría novel
O Concello de Pamplona convoca o XXXV Certame Literario en éuscaro para autoría novel co obxectivo de promover a creación literaria nesta lingua. As persoas participantes deben nacer ou residir en Navarra e non ter máis dun libro individual publicado. O prazo de presentación remata o 27 de outubro de 2025. O certame inclúe as modalidades de poesía e narración, con premios de ata 2500 euros e varias mencións. Os textos deben ser orixinais, inéditos e de temática libre.
Fonte: Iruñeko Udala
O Concello de Pamplona impulsa a creatividade en éuscaro coa convocatoria dunha nova edición do seu certame literario
O Concello de Pamplona convoca o XXXV Certame literario en éuscaro para autoría novel nas modalidades de poesía e narrativa, dirixido a persoas nacidas ou residentes en Navarra. As obras deberán ser orixinais e inéditas, e poderán presentarse ata o 27 de outubro. O concurso reparte 9000 euros en premios.
Fonte: Iruñeko Udala
Navarra impulsa o uso social do éuscaro cun convenio entre Euskarabidea e a asociación LABA
O Goberno de Navarra asinou un acordo con Laba Elkartea, asociación que promove a cultura vasca, co obxectivo de fomentar o uso do éuscaro en espazos sociais. O convenio inclúe actividades culturais e educativas que incentivan a visibilidade e a práctica diaria da lingua.
Fonte: Euskarabidea
O Concello de Pamplona contrata un servizo de atención telefónica en 19 idiomas
O servizo de interpretación telefónica en tempo real ofrecerá atención en 19 idiomas (entre eles, árabe marroquí, árabe clásico, ucraíno, inglés, francés, ruso, polaco, búlgaro, persa, urdu, wolof, sirio, chinés mandarín...) para garantir que toda a cidadanía poida acceder aos servizos sociais, independentemente da súa lingua. O novo contrato, motivado polo aumento da demanda, busca asegurar unha atención equitativa, especialmente para persoas migrantes.
Fonte: Iruñeko Udala
O Goberno de Navarra fai balance dos avances na presenza do éuscaro na Administración
O Goberno de Navarra reforzou a presenza do éuscaro na súa Administración ao establecer 769 prazas con esixencia lingüística e valorar o idioma noutras 8078, para adaptar os servizos públicos á realidade bilingüe da cidadanía. Tamén promoveu dous proxectos europeos para achegar o éuscaro á mocidade e modernizar os medios que o empregan.
Fonte: Gobierno de Navarra
Un acordo de colaboración entre o Goberno navarro e a asociación Laba Elkartea porá o foco na promoción do éuscaro entre a mocidade
O Goberno de Navarra e a asociación Laba Elkartea asinaron un convenio para promover o uso social do éuscaro en Pamplona, con especial atención á mocidade. O acordo, cun orzamento de 26 000 euros para 2025, inclúe proxectos como a acollida de persoas migrantes, bolsas para novos proxectos sobre o éuscaro e actividades para fortalecer a comunidade euscaldún.
Fonte: Gobierno de Navarra
Euskarabidea asina convenios con tres entidades navarras de desenvolvemento para a contratación de axentes de promoción do éuscaro
O director xeral de Euskarabidea, Javier Arakama, presentou convenios de colaboración con tres entidades navarras de desenvolvemento: TEDER, Consorcio de Zona Media e Cederna-Garalur. O obxectivo é contratar axentes de promoción do éuscaro e implementar un programa de actividades en 2025 para mellorar os dereitos lingüísticos da cidadanía. Estes convenios buscan fortalecer a presenza desta lingua nas zonas rurais, coa contratación de persoal cualificado para promocionar e asesorar sobre o seu uso en diferentes contextos sociais.
Fonte: Gobierno de Navarra
O Goberno navarro e Eusko Ikaskuntza renovan o seu convenio de colaboración para impulsar o éuscaro en Navarra
Este convenio de colaboración ten como obxectivo promover o estudo e o fomento do éuscaro. O acordo, cun orzamento de 60 000 euros, financiará proxectos como "EzBerdin Berdinak", que reflexiona sobre a identidade vasca, e "Elkarbizitzarako zubiak Nafarroan", centrado na convivencia intercultural. Ambos proxectos buscan fortalecer a transmisión cultural e fomentar o diálogo entre as diversas comunidades, especialmente en relación co éuscaro e a identidade de Navarra.
Fonte: Gobierno de Navarra
Boletín
Subscríbase ao boletín
