País Vasco
Patxi López comprométese a manter o financiamento de actividades en éuscaro
Manter o financiamento público das actividades realizadas en éuscaro foi o compromiso que rubricou Patxi López no seu discurso ante o Parlamento vasco. «Cumprirei a miña palabra de non reducir a dotación económica das actividades realizadas en éuscaro porque entendo que a cultura feita nesta lingua merece unha atención constante e un trato especial».
Fonte: El Correo Digital
O Concello de Barakaldo pon en marcha o seu primeiro Plan de uso do éuscaro na Administración
A Área de Cultura, Educación, Éuscaro e Deportes do Concello de Barakaldo, coa colaboración do Organismo Autónomo Municipal - Barakaldoko Euskara Udal Erakundea, puxo en marcha o primeiro Plan de uso do éuscaro na Administración, como un primeiro paso cara á aprobación dun Plan xeral de normalización do uso do éuscaro no municipio.
Fonte: Europa Press
A Consellería de Educación non poderá revogar os decretos do éuscaro ata o vindeiro curso
A nova conselleira de Educación, Isabel Celaá, quere revogar os decretos que establecen o éuscaro como lingua vehicular nas etapas de infantil e bacharelato, e no currículo de primaria e secundaria.
Fonte: El País
Máis de 900 mozos e mozas participan no programa de uso do éuscaro 'Harrapazank'
Máis de 900 mozos e mozas participaron no programa de actividades culturais 'Harrapazank', destinado a promover o emprego do éuscaro entre rapaces e rapazas de 12 a 16 anos.
Fonte: El Correo Digital
A Radiotelevisión Pública Vasca e o Instituto Cultural Vasco de Iparralde promoverán o éuscaro en internet
Euskal Kultur Erakundea, o Instituto Cultural Vasco de Iparralde, e eitb.com asinaron o pasado luns 11 de maio un convenio de colaboración para promover e difundir a cultura e a lingua vascas en internet.
Fonte: EITB
O Tribunal Superior de Xustiza vasco admite os recursos contra o uso do éuscaro como idioma principal na escola
O Tribunal Superior de Xustiza do País Vasco admitiu a trámite o recurso -e a solicitude de medidas cautelares-, da plataforma a favor do castelán contra os artigos que fixan o éuscaro como lingua principal na escola nos decretos de infantil e bacharelato.
Fonte: El Correo Digital
A conselleira vasca de Educación avoga por "superar o debate das linguas" e comprométese a impulsar unha sociedade bilingüe
A conselleira de Educación do Goberno vasco, Isabel Celaá, avogou por "superar o debate das linguas" porque "o éuscaro é algo natural" e comprometeuse a impulsar unha sociedade bilingüe.
Fonte: El Correo Digital
O Goberno vasco aposta pola convivencia "harmónica" das dúas linguas oficiais
O Goberno vasco aposta pola convivencia "harmónica" das dúas linguas oficiais e mantén que a política educativa e lingüística debe responder á existencia de dúas linguas oficiais e debe promover un bilingüismo "integrador".
Fonte: Europa Press
O Goberno vasco "garantirá" a oferta de ensino en éuscaro e castelán pero aspira a implantar un modelo trilingüe
A voceira do Goberno vasco, Idoia Mendía, afirmou que o Executivo manterá o actual sistema de modelos lingüísticos e "garantirá" a posibilidade dos pais de optar por calquera dos tres modelos -en éuscaro, en castelán ou bilingüe-- para a educación dos seus fillos, aínda que recoñeceu que a aspiración do gabinete de Patxi López é implantar un sistema trilingüe que introduza o inglés como terceira lingua no sistema educativo vasco.
Fonte: Europa Press
O Goberno de Ibarretxe asegurou que a oferta de clases en castelán en 2008 diminuíu pola baixa demanda
A Consellería de Educación do Goberno vasco presidido por Juan José Ibarretxe, ante as queixas recibidas polo Valedor do Pobo, respondeulle a este que o descenso da oferta de clases en castelán durante 2008 se debeu á diminución da demanda.
Fonte: Europa Press
Boletín
Subscríbase ao boletín
