País Vasco
O Goberno vasco renova os seus convenios de colaboración en materia lingüística con Euskararen Erakunde Publikoa e Euskaltzaindia
O Goberno vasco aprobou a renovación do convenio marco con Euskararen Erakunde Publikoa de Iparralde que establece a colaboración transfronteiriza en materia de política lingüística sobre o éuscaro. Así mesmo, aprobou tamén o convenio coas deputacións forais e Euskaltzaindia para a investigación e a difusión da lingua vasca.
Fonte: Gobierno Vasco
Preséntase a aplicación Txikipedia, unha wikipedia en éuscaro dirixida ao alumnado de entre 8 e 12 anos
O Goberno vasco e Euskal Wikilarien Kultura Elkartea presentan a aplicación Txikipedia, desenvolvida por CodeSyntax. Trátase dunha wikipedia en éuscaro dirixida ao alumnado de primaria que na actualidade inclúe máis de 3000 artigos, un número que vai en aumento grazas ao traballo realizado nas escolas.
Fonte: Gobierno Vasco
O Goberno vasco destinará 515 000 euros ás publicacións en éuscaro
O Departamento de Cultura destinará 640 000 euros a axudas para a promoción da edición literaria, dos cales 515 000 serán para publicacións en éuscaro e 125 000, en castelán.
Fonte: El Diario Vasco
A Deputación Foral de Biscaia ofrécelle ao seu persoal un programa para practicar éuscaro por medios telemáticos
A Deputación Foral de Biscaia organizará unha segunda edición do programa Berbanet, para que o seu persoal teña a posibilidade de practicar éuscaro a través de medios telemáticos co obxectivo de que mellore a fluidez e consolide o hábito de falar esta lingua.
Fonte: Deia
Máis de 1100 persoas da comarca de Buruntzaldea xa sacaron o carné de conducir en éuscaro
Os seis concellos que forman a comarca de Buruntzaldea (Urnieta, Andoain, Astigarraga, Hernani, Lasarte-Oria e Usurbil) levan anos traballando coas autoescolas para animar o alumnado destas a que saquen o carné B1 en éuscaro.
Fonte: El Diario Vasco
Convócanse as bolsas Berdintzen para investigacións sobre o éuscaro e a igualdade de xénero
O Goberno vasco pon en marcha o programa Berdintzen 2021 para a realización de estudos sobre o éuscaro e a igualdade de xénero. En total convoca catro bolsas de 7500 euros cada unha.
Fonte: Gobierno Vasco
Póñense en marcha un ano máis os encontros para mozas e mozos dos municipios euscaldúns
Estes encontros, para os que acaba de abrirse o prazo de inscrición, celebraranse do 28 de xuño ao 4 de xullo. O seu obxectivo é sensibilizar, concienciar e converter a xente nova en axentes activo arredor do éuscaro.
Fonte: El Diario Vasco
Segundo un estudo, na provincia de Biscaia fálanse máis de 120 linguas
Un estudo da Deputación Foral recolle as conclusións dunha investigación realizada polo Clúster de Sociolingüística co que se pretendía coñecer a diversidade lingüística de Biscaia, máis alá do éuscaro, o castelán ou o inglés.
Fonte: 20minutos
O Concello de Donostia subvencionará a sinalización en éuscaro dos establecementos comerciais e hostaleiros
O Concello de Donostia destinará unha partida de 10 000 euros a subvencionar a sinalización exterior e interior en éuscaro de comercios e hostalería. O obxectivo destas axudas é avanzar no proceso de normalización desta lingua na cidade e incrementar o seu uso no ámbito socioeconómico.
Fonte: Donostiako Udala
Euskal Irrati Telebista e Euskaltzaindia asinan un convenio de colaboración para difundir un modelo de éuscaro de calidade
Euskal Irrati Telebista (EITB) e Euskaltzaindia asinaron en Bilbao un acordo de colaboración, con vixencia ata 2024, que ten como obxectivo impulsar e difundir un modelo de éuscaro de calidade.
Fonte: Deia
Boletín
Subscríbase ao boletín
