A Confederación Estatal de Persoas Xordas (CNSE) celebrou o 18.º aniversario da Lei 27/2007, que recoñeceu por primeira vez as linguas de signos española e catalá e garantiu o dereito das persoas xordas a comunicarse sen barreiras. A entidade destaca os avances logrados, mais advirte das desigualdades territoriais, a falta de financiamento estable e a escaseza de intérpretes e profesorado signante, polo que reclama máis coordinación institucional e recursos para facer efectivo o dereito á comunicación en lingua de signos en todo o Estado.

Fonte: Diario de la DisCapacidad

A Institución Francesc de Borja Moll iniciou a dixitalización do Diccionari català-valencià-balear, un proxecto que permitirá ofrecer acceso público e gratuíto ao contido do dicionario cun sistema avanzado de busca e conexión coas súas fontes orixinais.

Fonte: Diari de la Llengua

O Congreso aproba unha proposición non de lei que insta o Goberno a promover a formación en linguas cooficiais do persoal sanitario nos territorios correspondentes. A iniciativa busca garantir unha atención máis humana e respectuosa cos dereitos lingüísticos da cidadanía e axudar a superar barreiras de comunicación que poden afectar á calidade do servizo. Os plans de formación serán voluntarios, gratuítos e adaptables, e incluirán recursos e materiais axeitados ao persoal sanitario, con avaliación periódica da súa eficacia.

Fonte: Siglo XXI

Na última comparecencia da comisión parlamentaria de control de RTVE, o debate centrouse na escasa presenza do éuscaro na programación estatal. O presidente de RTVE, José Pablo López, anunciou medidas como a esixencia do nivel B2 de éuscaro ao persoal informativo nos centros de Euskadi a partir de 2026 ou a dobraxe da canle infantil Clan, entre outras.

Fonte: GasteizBerri

O Ministerio de Política Territorial e Memoria Democrática vén de crear, mediante o Real Decreto 798/2025, o Consello das Linguas Oficiais, órgano colexiado encargado de analizar e coordinar o uso das linguas cooficiais na Administración do Estado. O decreto establece tamén a Oficina para as Linguas Oficiais, concibida como unidade permanente de apoio e promoción, que asumirá funcións de estudo, planificación, asesoramento e seguimento da presenza destes idiomas na Administración.

Fonte: Consello da Cultura Galega

O Congreso analizará unha reforma legal que obrigará as grandes empresas e as que presten servizos de interese xeral a ofrecer atención en todas as linguas cooficiais. A medida, que afecta sectores como enerxía, telecomunicacións ou transporte, inclúe tamén a prohibición de chamadas comerciais non desexadas e novas garantías para o consumo en liña.

Fonte: Capital

A Eurorrexión Pireneos Mediterráneo abre a convocatoria da terceira edición do concurso CREAOCCAT, dirixido a creadores de contido nas redes sociais en catalán e occitano, cun formato novo que fomenta a colaboración transfronteiriza. O concurso, que estará aberto ata o 30 de outubro de 2025, busca reforzar os vínculos culturais e lingüísticos entre Cataluña, as Illas Baleares e a Rexión de Occitania.

Fonte: Generalitat de Catalunya

CHA e Sumar solicítanlle ao Goberno español a incorporación do aragonés e do asturiano nas ensinanzas das Escolas Oficiais de Idiomas, co obxectivo de facilitar a súa aprendizaxe e certificación. Propoñen modificar o Real Decreto 1041/2017 para incluír explicitamente estas linguas recoñecidas polas comunidades autónomas ou pola Carta Europea das Linguas Rexionais ou Minoritarias.

Fonte: Aragón Digital

A Conferencia Episcopal Española publica estas lecturas en galego catalán e éuscaro co obxectivo de facilitarlles a eucaristía ás persoas que falen esta linguas. Únense así a outros idiomas xa publicados, como o inglés, o alemán, o italiano e o francés, que irán aumentando nas vindeiras semanas.

Fonte: Conferencia Episcopal Española

As televisións públicas de Euskadi (EITB), Cataluña (3CAT) e Galicia (TVG) uníronse para crear Pensión Incompleta, a primeira serie gravada nas catro linguas oficiais do Estado. A coprodución, que se presentou no marco do foro Conecta Fiction & Entertainment, mesturará galego, éuscaro, catalán e castelán como linguas orixinais e ten previsto o seu lanzamento en 2026.

Fonte: CRTVG