A última edición da versión en liña do Dicionario da lingua española da RAE pechou o ano 2017 con preto de 750 millóns de visitas. A media mensual de consultas foi de 65 millóns e foi marzo o mes no que máis visitas se rexistraron (82 millóns).

Fonte: Real Academia Española

A edición de 2018 do Premio Nacional á Mellor Tradución aceptará recoñecer obras traducidas do castelán a outras linguas oficiais de España e viceversa. Isto será posible grazas a unha solicitude da Real Academia da Lingua Vasca, pois, en edicións anteriores, as bases do galardón non recollían a posibilidade de premiar traducións a outras linguas de obras escritas en castelán.

Fonte: ABC

De acordo co Libro branco do desenvolvemento español de videoxogos 2017, a lingua galega, a vasca e, especialmente, a catalá incrementaron a súa presenza nos videoxogos publicados no ano 2016. No caso do galego, un 5% incorpora esta lingua, mentres que para o éuscaro a porcentaxe se reduce ao 3%, en ambos os casos, un punto porcentual máis que o ano anterior. Destaca o crecemento do 10% do catalán, pois un de cada catro inclúeo entre as súas opcións lingüísticas.

Fonte: Videojuegos vascos

En España existen ata 6 linguas con máis de 250 000 falantes que se atopan en risco de desparecer, segundo datos da Organización das Nacións Unidas para a Educación, a Ciencia e a Cultura (UNESCO). Estas linguas son o bable, o aranés, o aragonés, a fala estremeña, o tamazight e o caló.

Fonte: EcoDiario

A Real Academia Española (RAE) levará a cabo a presentación da nova plataforma lingüística Enclave RAE na cidade de Albacete na primavera de 2018. Esta nova plataforma tecnolóxica pretende servir para mellorar o uso da lingua castelá nos ámbitos educativo e profesional, así como nas institucións públicas.

Fonte: La Cerca

O grupo de expertos da Real Academia Española está estudando a posibilidade de modificar a definición da palabra "luxo" por considerar que as acepcións recollidas actualmente no dicionario conteñen unha connotación negativa.

Fonte: Debate

Un estudo recente sobre os hábitos de lectura dos euscaldúns conclúe que soamente un 22,9% dos enquisados le habitualmente en éuscaro, debido a, entre outros motivos, a falta de tempo ou a ausencia de contidos determinados.

Fonte: El Diario Vasco

Algunhas palabras do dicionario da Real Academia Española serán revisadas por conter connotación machista na súa definición, como xa se fixo co termo "fácil" para referirse a "muller que se presta sen problemas a manter relacións sexuais".

Fonte: Misiones Cuatro

Con motivo da celebración do centenario da Euskaltzaindia, a Real Academia da Lingua Vasca, prevese organizar nove congresos entre 2018 e 2019 en todos os territorios en que se fala éuscaro, nos que se tratarán asuntos relacionados cos ámbitos de actuación da Academia.

Fonte: El Diario

ERC presentou unha proposición de lei no Congreso para solicitar protección e promoción das linguas españolas oficiais distintas do castelán: catalán, éuscaro, galego e occitano.

Fonte: La Vanguardia