España
Preséntanse as novas ferramentas lingüísticas elaboradas no marco do proxecto LEIA
A Real Academia Española presentou en Madrid as novas ferramentas creadas no proxecto LEIA (Lingua Española e Intelixencia Artificial), destinado a protexer e potenciar o uso do español no ámbito dixital e da IA. A iniciativa, apoiada polo Ministerio para a Transformación Dixital, inclúe un observatorio de palabras, sistemas de verificación lingüística, un servizo de consultas e un mapa das variedades do español. Estas aplicacións, deseñadas con criterios de accesibilidade, xa se empregan internamente na RAE e estarán dispoñibles publicamente para a comunidade hispanofalante.
Fonte: Real Academia Española
A Generalitat de Cataluña ampliará as prazas para aprender catalán nos niveis A1 e A2
A Consellería de Política Lingüística ampliará en 10 000 as prazas para cursos de catalán de niveis iniciais A1 e A2, grazas ás axudas concedidas a concellos, consellos comarcais e entidades sociais. Estas novas prazas súmanse ás máis de 41 000 persoas xa inscritas, unha cifra récord impulsada polo plan de choque para o ensino do catalán.
Fonte: 20minutos
Valentín García traslada a importancia de que "os programas de xestión do Estado atendan á realidade plurilingüe"
O secretario xeral da Lingua, Valentín García, participou en Donostia na constitución do novo Consejo de las Lenguas Oficiales, órgano estatal de seguimento en materia de política lingüística que substitúe ao anterior incorporando, entre outras novidades, como membros de pleno dereito aos representantes das comunidades autónomas con linguas oficiais: Galicia, País Vasco, Cataluña, Comunidade Foral de Navarra, Comunidade Valenciana e Illas Baleares.
Fonte: O Portal da Lingua Galega
Nace o Correllengua Agermanat, unha carreira que busca superar as barreiras administrativas e reivindicar a unidade do catalán
Máis dun cento de entidades presentaron o Correllengua Agermanat, unha nova iniciativa que busca unir os territorios de fala catalá e reivindicar a lingua como vínculo común. A partir do 19 de abril de 2026, percorrerá 17 etapas e máis de 1500 quilómetros, pasando por Cataluña, Comunidade Valenciana, Cataluña Norte ou L’Alguer.
Fonte: Diari de la Llengua
A Universidade das Illas Baleares aproba o Plan de linguas 2026-2030 para fomentar o uso do catalán como lingua propia da institución
O Plan de linguas 2026-2030 define a estratexia da UIB para reforzar o uso do catalán e promover o multilingüismo. O documento busca consolidar o catalán como lingua propia da institución e potenciar a diversidade lingüística como ferramenta de apertura internacional. Entre os seus obxectivos destacan garantir os dereitos lingüísticos da comunidade universitaria, mellorar a competencia comunicativa e fomentar o uso do catalán en todos os ámbitos académicos e administrativos mediante formación, programas de acollida e apoio á docencia e investigación nesta lingua.
Fonte: Última Hora
Valentín García pon en valor “os avances da Xunta para intensificar a presenza do galego no eido dixital”
O secretario xeral da Lingua, Valentín García, participou en Donostia nunha xornada dedicada ao impulso das linguas oficiais do Estado na intelixencia artificial, tras formar parte, xunto cos seus homólogos do País Vasco, Cataluña, Navarra, Comunidade Valenciana e Illas Baleares, na constitución do novo Consejo de las Lenguas Oficiales, órgano estatal de seguimento en materia de política lingüística.
Fonte: O Portal da Lingua Galega
Sete centros de secundaria de Pamplona participan no programa «Sartu eta Sortu» que busca reforzar o vínculo da mocidade co éuscaro
O Concello de Pamplona impulsa unha nova edición do programa «Sartu eta Sortu», destinado a fomentar o uso social e cultural do éuscaro entre o alumnado de primeiro da ESO. Sete centros do modelo D participan nesta iniciativa, que ofrece encontros en éuscaro con creadoras e creadores recoñecidos da cultura, a ciencia e o deporte.
Fonte: Pamplona Actual
Comeza a quinta edición do ciclo «Gora Gora Fest!» que levará unha ampla oferta de actividades en éuscaro por toda Navarra
O Goberno de Navarra, a través de Euskarabidea, pon en marcha a 5ª edición do «Gora Gora Fest!» 2025, un ciclo cultural en éuscaro con dez espectáculos gratuítos que percorrerán 65 localidades entre o 7 de novembro e o 14 de decembro. A proposta diríxese a nenas/os, mocidade e familias e prioriza concellos de menos de 3000 habitantes, para achegarlles oferta cultural en éuscaro onde apenas existe.
Fonte: Gobierno de Navarra
Ponse en marcha a segunda edición Correllengua Universitari para impulsar o uso do catalán nas universidades
Comeza a segunda edición do Correllengua Universitario, destinado a fortalecer o uso do catalán nas universidades e a formar o alumnado sobre os seus dereitos lingüísticos. Durante varios días, diferentes universidades catalás acollerán actividades culturais e educativas para reivindicar a lingua e a cultura propias. A iniciativa pretende que o estudantado poida detectar e denunciar vulneracións das normas que protexen o catalán e ofrecerlle guías e materiais prácticos para facelo.
Fonte: Diari de la Llengua
O programa de cinema infantil en catalán retoma a súa actividade con máis de 170 proxeccións
O programa de Cinema Infantil en Català (CINC), impulsado polo Departamento de Política Lingüística, reactivouse este outubro con 174 proxeccións en 32 localidades de Cataluña e Aragón. A iniciativa ofrece películas dobradas ao catalán, a prezos reducidos e cunha ampla distribución territorial co obxectivo é ampliar a oferta e o consumo de cinema en catalán.
Fonte: Generalitat de Catalunya
Boletín
Subscríbase ao boletín
