Unha enquisa en liña do Observatorio Vasco da Xuventude, dirixida a mozas e mozos de 15 a 29 anos, mostra un cambio de tendencia na lingua empregada para completala. Así, máis da metade, en concreto, o 52,3 % respondeu en éuscaro, mentres que o 47,7 % restante utilizou o castelán.

Fonte: Gobierno Vasco

BNG, Compromís, PNV, EH Bildu, JxCat, PDCAT, ERC, CUP, Más Madrid e Podemos rexistraron unha proposición non de lei no Congreso coa que se pretende acabar coas discriminación lingüística e garantir a pluralidade de linguas no Estado español e que recolle parte do manifesto ‘Liberdade, igualdade, democracia’ presentado por entidades de defensa das linguas cooficiais.  

Fonte: Nós Diario

Malia que a partida para promoción do asturiano sobe ata 2.077.271 euros, o que supón 172.641 euros máis en comparación con este ano, continúa representando o 0,04 % do total.

Fonte: El Comercio

Co gallo da celebración o 3 de decembro do Día Internacional do Éuscaro, o lehendakari leu unha declaración institucional, consensuada polo Goberno vasco, as tres deputacións forais, os concellos das capitais de provincia vascas, EUDEL e UEMA, no transcurso da primeira reunión do Consello Asesor do Éuscaro desta lexislatura.

Fonte: Goberno Vasco

A Xunta pola Defensa de la Llingua Asturiana (XDLA) reuniuse cos dous candidatos a reitor para propoñerlles un decálogo de medidas para o uso do asturiano na Universidade de Oviedo, entre as que figuran a posta en marcha dun plan de normalización lingüística ou a posibilidade de examinarse e recibir coñecementos nesta lingua.  

Fonte: La Vanguardia

O Goberno vasco presentou o dicionario Feminismoa eta Berdintasuna, que inclúe termos básicos e os seus correspondentes conceptos e definicións en materia de feminismo e igualdade, tanto os establecidos na lexislación vixente como os xurdidos dos movementos sociais.

Fonte: El Diario Vasco

As probas de lingua catalá da Dirección Xeral de Política Lingüística das Baleares celebraranse durante os meses de xaneiro e febreiro de 2021. Nelas inscribíronse 8122 persoas, o que supón un incremento de case 2000 inscricións respecto á última convocatoria.

Fonte: Menorca

O Instituto de Estudos Eivisencos organiza unha nova campaña para promover a participación no programa de Voluntariado Lingüístico, unha iniciativa que busca dinamizar o uso social do catalán na illa a través da formación de parellas lingüísticas e encontros en grupo.

Fonte: Diario de Ibiza

O Goberno balear concedeu axudas por valor de 575 000 euros a medios de comunicación en catalán do arquipélago, tanto prensa como publicacións especializadas, radio e televisión. Con esta liña de subvencións o executivo busca garantir o dereito lingüístico da cidadanía a recibir información nesta lingua.

Fonte: Última Hora

O dicionario normativo de aranés xa está dispoñible en liña. Conta cunhas 10 800 entradas, que incorporan a equivalencia catalá, 13 000 definicións, 1000 topónimos, 430 exemplos e 770 sinónimos.

Fonte: Generalitat de Catalunya