España
O Goberno de Aragón asina convenios con sete comarcas para promover o aragonés e o catalán
O Goberno de Aragón destinará 5000 euros a cada unha das sete comarcas coas que vai asinar acordos de colaboración para o fomento da lingua aragonesa e as súas variedades dialectais, así como do catalán que se fala nesta comunidade.
Fonte: El Periódico de Aragón
Atlàntida Film Fest proxectará 15 longametraxes en versión orixinal subtitulada en catalán
A décima edición do Atlàntida Film Fest contará con sesións presenciais en Palma e en Barcelona. Neste festival poderanse ver quince longametraxes en versión orixinal subtitulada en catalán.
Fonte: Generalitat de Catalunya
O Concello de Muskiz fomenta a utilización do éuscaro nos rótulos dos establecementos comerciais e hostaleiros
Os establecementos comerciais e hostaleiros de Muskiz poderán acollerse ao programa de axudas impulsado dende o Concello, ao que destinará 1500 euros, para poñer un rótulo e un toldo en éuscaro.
Fonte: El Correo
Denuncian as dificultades para realizar os exames do carné de conducir en valenciano
Plataforma per la Llengua solicitoulle á delegada do Goberno en Valencia que se investiguen as dificultades para realizar os exames do carné de conducir en valenciano e demandan que as preguntas dos tests se formulen tamén nesta lingua e non só en castelán.
Fonte: Levante-EMV
O Goberno de Navarra e a Real Academia da Lingua Vasca renovan o seu convenio de colaboración
Este convenio para o ano 2020 entre ambas as institucións ten como obxectivo normalizar e colaborar no desenvolvemento, estudo e investigación do éuscaro. Algúns dos proxectos que se impulsarán son a participación en dicionarios así como en traballos de onomástica e toponimia.
Fonte: Diario de Navarra
Asociacións asturianas e leonesas organizan unha campaña para concienciar sobre a unidade lingüística dos seus territorios
As asociacións Faceira e Iniciativa pol Asturianu puxeron en marcha, a través das redes sociais, a campaña #FalamosIgual, coa que pretenden amosar que León e Asturias comparten unha lingua, malia que reciba nomes diferentes nos dous territorios, cunha gran parte de léxico común e unha mesma gramática.
Fonte: León Noticias
O Goberno de Navarra apoia a produción de contidos dixitais en éuscaro na Wikipedia
O Goberno de Navarra subscribiu un convenio de colaboración, cunha achega económica de 25 000 euros, coa asociación cultural Euskal Wikilarien Kultur Elkartea para impulsar a creación, a difusión e o consumo de contidos dixitais culturais en éuscaro na Wikipedia.
Fonte: Noticias de Navarra
O sistema estatal de axudas ao cine incentivará a creación audiovisual en lingua de signos
O Ministerio de Cultura e Deporte publicou recentemente a orde que establece as bases reguladoras das axudas estatais para a produción de longametraxes e curtametraxes. Nela recóllense incentivos para as creacións audiovisuais en lingua de signos española e lingua de signos catalá.
Fonte: Compromiso Empresarial
A Universidade Jaume I inicia unha campaña para promover a matrícula en valenciano
A campaña «A la Universitat, en valencià: sense complexos!» ten como obxectivo, por unha banda, promover a matrícula en valenciano e, por outra, reforzar e fomentar o uso desta lingua no ámbito universitario.
Fonte: El Periòdic
Un novo xogo interactivo ofrece alternativas en catalán a préstamos innecesarios
A Dirección Xeral de Política Lingüística, en colaboración co Termcat, creou “Com ho diries en català?”, un xogo interactivo sobre préstamos innecesarios que ofrece formas catalás alternativas a expresións tomadas principalmente do inglés e do castelán.
Fonte: Generalitat de Catalunya
Boletín
Subscríbase ao boletín
