O actual presidente do Principado, Adrián Barbón, parecía disposto a abrir o debate sobre a oficialidade do asturiano, pero a irrupción do coronavirus sacou da axenda política o tema da reforma do Estatuto de Autonomía para facela posible.

Fonte: Asturies.com

O Goberno vasco implantará a gratuidade da matrícula para o alumnado de entre 16 e 30 anos que acredite o nivel C1 de éuscaro. O obxectivo desta iniciativa é axudar a que a mocidade adquira unha capacitación lingüística máis elevada para que poida desenvolver a súa carreira profesional nesta lingua.

Fonte: Noticias de Gipuzkoa

Co lema Euskaraz, talentua gara!, organizarase unha campaña de identificación e difusión de boas prácticas, con charlas para responsables dos centros de FP e almorzos de traballo con responsables dos centros de traballo co obxectivo de reflexionar sobre o uso e as funcións das linguas e amosar o valor engadido que ofrece o éuscaro no mundo laboral.

Fonte: Gobierno Vasco

A Plataforma per la Llengua presentou nas Illas Baleares o Selo de Produto Lingüisticamente Responsable para implantar nas empresas do arquipélago co obxectivo de identificar os produtos etiquetados en catalán e impulsar o seu consumo.

Fonte: La Vanguardia

Un total de 67 beneficiarios, entre particulares, empresas, asociacións e clubs deportivos, van repartirse as axudas que o Consell de Menorca destina á promoción do uso do catalán en diferentes sectores.

Fonte: Menorca

A Asociación de Persoas Xordas de Vic e Comarca puxo en marcha, co apoio da Generalitat de Cataluña, Espiell, unha plataforma dixital con contidos culturais para fomentar a lingua de signos catalá, que inclúe tamén a opción de subtítulos en catalán, castelán e inglés.  

Fonte: Generalitat de Catalunya

Nos últimos meses apareceron algúns xogos en asturiano cunha moi boa acollida, entre elas o primeiro xogo de rol nesta lingua: Después d'ochobre. Proba do seu éxito é que esta versión superou en vendas á súa homóloga en castelán.

Fonte: El Comercio

O Consorcio para a Normalización Lingüística pon a disposición de empresas e asociacións empresariais un servizo de asesoramento para facilitarlles recursos que melloren a calidade lingüística en catalán e a comunicación nas redes sociais.

Fonte: Generalitat de Cataluña

Cada ano prodúcense arredor dun milleiro de vídeos musicais en catalán. Para darlles visibilidade nace na canle 33 o programa Clipping, que ofrecerá cada sábado unha selección de videoclips que mostren a actualidade musical e audiovisual de Cataluña.

Fonte: El Periódico

Segundo a Plataforma per la Llengua, o emprego do catalán nas horas lectivas dos estudos de Dereito nas universidades non chega nin ao 50 %, tanto nos estudos de grao como de mestrado, unha situación que repercute no sistema xudicial.

Fonte: Plataforma per la Llengua