Por terceiro ano consecutivo, convócase o concurso de traballos de investigación lingüística sobre o éuscaro no ámbito de Navarra, ao que se destinarán 12 000 euros. O obxectivo desta convocatoria é difundir os proxectos de campos como a lexicografía, a dialectoloxía, a toponimia e a sociolingüística.

Fonte: Noticias de Navarra

O aumento de peticións para acceder a algunha das liñas de axuda para o fomento do catalán en Menorca foi espectacular, ao pasar de 38 en 2019 a 82 en 2020. En total repartiranse 40 000 euros en catro liñas: edición, con 19 solicitudes; empresa, con 38; deporte, con sete; e tecido asociativo, con oito.

Fonte: Menorca.info

O Senado deu o seu apoio a unha iniciativa parlamentaria presentada polo PNV para instar o Goberno a que garanta que as Administracións promovan as linguas minorizadas e o dereito da cidadanía a empregalas nos seus trámites.

Fonte: La Vanguardia

O Concello de Gandía presentou a campaña "Gandia en valencià", dirixida aos establecementos hostaleiros para normalizar o uso do valenciano. No marco desta iniciativa repartiranse 10 000 manteis de papel entre a hostalería da cidade.

Fonte: Saforguia

En outubro comezan os novos grupos de Mintzalaguna, unha iniciativa mediante a que persoas que falan éuscaro se xuntan con outras que queren falalo, para o que se crean pequenos grupos de conversa que se reúnen unha hora á semana.

Fonte: Gasteiz Hoy

Un total de 800 persoas solicitaron a súa participación na primeira proba de certificación de lingua asturiana de nivel intermedio (B2), para a que se establecera un máximo de 500 prazas.

Fonte: La Nueva España

O Concello de Pamplona convoca subvencións para a realización de proxectos de promoción do éuscaro, unha convocatoria á que destinará 72 000 e que está dirixida a entidades e asociacións sen ánimo de lucro.

Fonte: Diario de Navarra

O Concello de Bilbao e a Real Academia da Lingua Vasca-Euskaltzaintza renovaron o convenio anual que manteñen desde 2008 polo cal ambas as institucións colaboran no desenvolvemento e a socialización do éuscaro na cidade, así como na organización de actos culturais. Ao abeiro deste convenio, Euskaltzaindia recibe unha subvención de 35 500 euros e presta asesoramento lingüístico aos diferentes servizos municipais.

Fonte: Deia

A Deputación de Áraba, en colaboración co Goberno vasco e o Concello de Vitoria, porá en marcha, no marco do programa Lanabes de impulso do uso do éuscaro no ámbito empresarial arabés, dous novos proxectos: unha comunidade de prácticas nesta lingua e un servizo de asesoramento lingüístico para as empresas.

Fonte: El Correo

O proxecto Lingua e prensa, impulsado pola Universidade de Málaga en 2008 para recompilar noticias xornalísticas sobre as linguas de España, permite na actualidade acceder a unha hemeroteca lingüística virtual que conta con máis de 22 000 novas etiquetadas procedentes de diferentes medios de comunicación.

Fonte: Consello da Cultura Galega