O Goberno de Romanía, a través da súa embaixada en España, seleccionará 30 profesores de lingua, cultura e civilización romanesa para dar clases gratuítas destas materias en horario extraescolar. Esta iniciativa, que xa se puxo en marcha o curso anterior noutras comunidades autónomas como Madrid, Cataluña e Castela-A Mancha, chega agora á Comunidade Valenciana e responde a unha necesidade que, desde distintas agrupacións do colectivo de residentes deste país en Castellón, se levaba demandando desde hai tempo.

Fonte: Las Provincias

O presidente de Ciutadans-Partido da Cidadanía (C"s), Albert Rivera, anunciou a convocatoria dunha manifestación en Barcelona para o próximo 28 de setembro en contra das linguas cooficiais. Ciutadans deu a coñecer esta convocatoria nunha protesta que os seus máximos dirixentes realizaron ás portas do Centro de Educación Infantil e Primaria (CEIP) Bogatell de Barcelona, onde lles entregaron aos pais un documento no que solicitaban ao centro que "respecten os dereitos lingüísticos dos seus fillos" para escoller a lingua castelá como idioma de ensino.

Fonte: Galicia Hoxe

O Servizo de Linguas e Terminoloxía da Universitat Jaume I puxo en marcha unha nova campaña de universidade en valenciano co obxectivo de incentivar a matrícula de ensino en valenciano. Baixo o lema "Cando te matricules pide docencia en valenciano!", a campaña dá a benvida ao curso 2008-2009 cun agasallo e uns consellos útiles para o futuro profesional dos estudantes que elixan esta opción.

Fonte: Levante

O Bloque Nacionalista Galego (BNG) preguntaralle ao presidente do Goberno, José Luis Rodríguez Zapatero, polas medidas que vai adoptar para "garantir" o respecto á lingua galega por parte da Administración central.

Fonte: Galicia Hoxe

Máis de 50.000 alumnos valencianos de segundo de ESO cursarán Educación para a Cidadanía en inglés, aínda que paradoxalmente dispoñerán de libros de texto e materiais didácticos nas dúas linguas oficiais da Comunidade.

Fonte: El Mundo

O presidente do Goberno, José Luis Rodríguez Zapatero , comprometeuse no pleno do Congreso a garantir o uso das linguas cooficiais en cumprimento do mandato constitucional e porque son, subliñou, unha «riqueza cultural do país».

Fonte: La Voz de Galicia

A Viceconsellería de Política Lingüística e o Instituto Vasco de Administración Pública (IVAP) traballarán conxuntamente para actualizar o banco público de terminoloxía do éuscaro, Euskalterm.

Fonte: Deia

José Luis Rodríguez Zapatero comprometeuse no Congreso a tomar as medidas necesarias para promover o uso do galego na Administración Xeral do Estado. Fíxoo en resposta ao portavoz do BNG, Francisco Jorquera, quen lle preguntou na sesión de control ao Goberno que accións ía adoptar para garantir o respecto á legalidade lingüística.

Fonte: La Voz de Galicia

A ministra de Educación, Política Social e Deporte, Mercedes Cabrera, asegurou que o seu ministerio non ten constancia de que haxa incumprimento ningún en referencia á terceira hora de castelán no sistema escolar de Cataluña.

Fonte: Avui

A Consellería de Educación ten previsto presentar en menos dun ano un programa de tradución do valenciano ao inglés e vicevera, a semellanza do programa Salt, dentro do obxectivo do Goberno valenciano de apostar polo trilingüismo.

Fonte: Levante