O Conceyu Abiertu pola Oficialidá está a traballar na convocatoria dunha nova mobilización pola oficialidade da lingua asturiana. Segundo anunciou esta plataforma de asociacións a favor do asturiano, a manifestación, co lema "Ensin Oficialidá nun hai Estatutu que valga", vai saír da Estación do Norte de Oviedo ás seis da tarde do sábado día 4 de outubro.

Fonte: Asturies.com

Os sindicatos de ensino maioritarios en Cataluña, Illas Baleares e Valencia esixíronlles ás administracións autonómicas e ao Goberno que o catalán, nas súas distintas variedades dialectais, sexa a lingua vehicular da educación nas escolas destes territorios.

Fonte: Levante

Air Berlín segue defendendo a súa política de empresa de utilizar o español para atender os clientes de España a pesar das cartas que recibiu por parte do Goberno balear e a Xunta de Galicia, e o contencioso que mantén por non utilizar o catalán nos seus voos coa Generalitat de Cataluña.

Fonte: Europa Press

A Asociación Cultural Fala Ceibe do Bierzo informa de que segue aumentando a demanda da materia de idioma galego nos centros educativos da rexión berciana. Así o declarou o delegado territorial da Junta de Castilla y León, Eduardo Fernández, aproveitando o inicio do curso escolar 2008-09.

Fonte: O Bierzo Ceibe

Tiveron que pasar 400 anos para que un reitor da Universidade de Oviedo falase en asturiano. Foi no acto de entrega dos diplomas dos XXVI Cursos de Verán en asturiano que cada ano se celebran en Ibias.

Fonte: El Comercio Digital

O municipio oscense de Fonz inaugurou, no salón de actos do concello, a Academia de l'Aragonés, para manter viva esta lingua que aínda persiste en Fonz, entre outras localidades do Alto Aragón, na súa modalidade baixorribagorzana.

Fonte: Europa Press

Desde o ano 2002 un convenio entre a Junta de Castilla y León e a Xunta de Galicia garante a protección da lingua galega, apostando sobre todo por darlle vida desde o seu ensino nos centros públicos de primaria.

Fonte: El Mundo

O pasado venres día 12 de setembro reuniuse, en Valladolid, a comisión de seguimento do protocolo de colaboración entre a Xunta e a Junta de Castilla y León para abordar o comezo do curso e analizar o 2007-2008

O número de alumnos do programa de estudos de galego nesta comunidade non deixou de medrar desde que se puxo en marcha

A Comisión Mixta de Seguimento da Lingua Galega reuniuse o pasado venres día 12 de setembro en Valladolid para avaliar o desenvolvemento do curso 2007-2008, tratar as repercusións da nova normativa de organización académica no desenvolvemento do Programa e concretar as perspectivas para o curso 2008/2009. Tanto os representantes de Galicia como de Castilla y León manifestaron un alto grao de satisfacción polo traballo desenvolvido e pola consolidación do Programa para a Promoción da lingua galega en Castilla y León.

Os datos analizados no encontro, que constatan o incremento anual no número de alumnos que seguen o programa de promoción do galego (1.003 este curso que agora comeza en Infantil e Primaria, ademais dos que se matriculen na Escola Oficial de Idiomas de Ponferrada). Tamén se concretaron accións de mellora relacionadas coa dotación de materiais didácticos e a apertura de vías de intercambio entre os alumnos de ambas as dúas comunidades.

A comisión mixta está integrada por representantes designados respectivamente pola Consejería de Educación da Junta de Castilla y León (Emilio Gutiérrez, director xeral de Planificación) e da Secretaría Xeral de Política Lingüística da Xunta de Galicia (Marisol López, secretaria xeral).

Os bos resultados obtidos tras o acordo de cooperación entre ambas as dúas consellerías para a promoción do idioma galego nos territorios limítrofes das comunidades autónomas (O Bierzo e Sanabria), asinado en xullo de 2001, chegouse ao protocolo xeral de colaboración entre a Junta de Castilla y León e a Xunta de Galicia para fomentar esta lingua nos citados territorios, asinado en agosto de 2006.

O obxecto deste protocolo é establecer as pautas de orientación política para a colaboración entre as dúas comunidades na promoción do galego nas provincias de León e Zamora, en concreto nas zonas do Bierzo e Sanabria, nas que esta lingua se fala, mediante a súa aprendizaxe nos centros non universitarios destas zonas.

A implantación destes estudos ten carácter voluntario para os centros e para os alumnos, de acordo co que establece a normativa vixente sobre autonomía pedagóxica, de organización e de xestión dos centros docentes, e para o alumnado. Non obstante, promoverase que os centros que optaran por este programa lle outorguen continuidade ao programa para garantir que os alumnos poidan completar os estudos e obter os certificados correspondentes.
Esta comisión de seguimento serve de punto de encontro entre as Comunidades, onde se leva a cabo o seguimento do protocolo vixente e se canaliza a colaboración prevista. Entre as súas funcións principais están:

a) Definir accións anuais que concreten a aplicación do protocolo
b) Estudar as peticións das comunidades escolares e favorecer o seu cumprimento.
c) Delimitar a extensión xeográfica da área de aplicación, concretando tanto os centros como o alumnado afectado
d) Establecer os criterios de selección e formación do profesorado
e) Propoñer as accións de formación, divulgación, bibliografía, materiais, etc. que permitan unha implantación de calidade deste ensino en correcta harmonía co ensino das linguas

Fonte: Xunta de Galicia

O Palacio Miramar de Donostia acolleu a presentación do curso académico 2008-09 de euskaldunización de adultos da man de HABE (Instituto para a Euskaldunización e Alfabetización de Adultos) e dos euskaltegis da rede pública e privada homologada. Este será o primeiro curso que se inicia cos títulos de éuscaro homologados, destacou Patxi Baztarrika, viceconselleiro de Política Lingüística. A continuación o eminente lingüista David Crystal impartiu a conferencia Keeping languages alive (Conservar vivas as linguas).

Fonte: Euskadi.net

O anteproxecto da Lei de educación de Aragón, elaborado polo Goberno rexional PSOE-PAR, prevé a posibilidade de que o catalán poida ser "lingua vehicular" en colexios e institutos de comarcas limítrofes con Cataluña.

Fonte: ABC