Un de cada dez anuncios emitidos en Televisió de Catalunya (TVC) está en castelán, segundo explicou o presidente do Consello de Goberno da Corporación Catalá de Medios Audiovisuais (CCMA), Albert Sáez, en resposta a unha pregunta por escrito da deputada de CiU Meritxell Borràs.

Fonte: El Mundo

A Consellería de Educación vaille trasladar ao presidente da Generalitat Valenciana, Francisco Camps, a proposta da Plataforma en defensa do ensino público de aplicar unha moratoria para aprazar a impartición en inglés da materia Educación para a Cidadanía.

Fonte: El Mundo

A parlamentaria do PP Laura Garrido presentou unha moción na que os 'populares' instan o Goberno vasco a que modifique a normativa que establece nas ofertas públicas de emprego (OPE) de Osakidetza a asignación dos perfís lingüísticos que corresponden a cada posto así como a valoración que se lle outorga ao éuscaro como mérito.

Fonte: Europa Press

A nova Proba de Acceso á Universidade (PAU), aprobada polo Consello de Ministros, entrará en vigor no curso 2011-2012 e incluirá un exame oral de lingua estranxeira que poderá ser en inglés, francés, alemán, italiano ou portugués.

Fonte: El Mundo

Desde 2005, a Junta de Castilla y León está traballando para situar a comunidade no centro do mapa do ensino do español, unha área educativa que paradoxalmente está en mans xa non españolas, senón británicas, estadounidenses ou suízas. O Plan do español 2005-09 da Consellería de Cultura, ampliado a 2011, quere crear, desde a Administración, unha infraestrutura e habilitar uns instrumentos para que a iniciativa privada aproveite o nicho económico da lingua española.

Fonte: ABC

Tras varios anos de peticións por parte da dirección da Escola Oficial de Idiomas Ignacio Luzán, de Monzón, o citado centro contará cun curso monográfico de catalán. Segundo fontes do centro, este curso de catalán, que podería ser de iniciación, desenvolverase no segundo cuadrimestre, que empeza entre finais de xaneiro e febreiro.

Fonte: La Mañana

En once universidades de oito comunidades autónomas hai case un millar de estudantes que escollen disciplinas relacionadas coa lingua, a literatura, a historia ou a cultura galegas. É unha cifra «boa», en valoracións da Secretaría Xeral de Política Lingüística, que subsidia os lectorados de galego, responsables da maior parte destas ensinanzas, que evidencian un interese na identidade galega. O obxectivo é aumentar a presenza en todas as comunidades.

Fonte: La Voz de Galicia

A Mesa per l'Ensenyament en Valencià (MEV) elaborou, con motivo do 25 aniversario da aprobación da Lei de uso e ensino do valenciano (LUEV), un informe no que denuncian a mínima aplicación da lei e os seus incumprimentos, así como dez propostas de implicación para o futuro.

Fonte: La Verdad

Joan Martí, o presidente da Sección Filolóxica do Institut d'Estudis Catalans (IEC), organismo financiado pola Generalitat de Catalunya, recomendou impoñer sancións económicas ou outros destinos laborais ás persoas que aparecen nos medios de comunicación e non falan ben o catalán.

Fonte: El Mundo

O director da Real Academia Española (RAE), Víctor García de la Concha, sinalou en Salamanca que a principal ameaza contra o idioma español é "o mal uso que os hispanofalantes facemos del".

Fonte: ABC