España
A Generalitat Valenciana recoñecerá cursos de idiomas aínda que non sexan os da Escola Oficial
As universidades, as cámaras de comercio, o Servef, institucións de recoñecido prestixio e escolas internacionais da Comunidade Valenciana poderán ofertar cursos de idiomas recoñecidos pola Generalitat, que acrediten competencias en linguas estranxeiras segundo o marco europeo.
Fonte: Las Provincias
O 41 % das empresas vascas utiliza o éuscaro e o castelán nas súas relacións internas
Un 41 % das empresas vascas utiliza o éuscaro e o castelán nas súas relacións internas. O 53,8 % di que utiliza só o castelán fronte ao 1,6 % que usa exclusivamente o éuscaro, segundo se desprende do estudo sobre competencias lingüísticas nas pemes vascas, promovido pola Asociación de Industrias da Lingua do País Vasco (LANGUNE).
Fonte: El Correo
A organización Compromisu por Asturies alerta sobre un “ataque brutal” á lingua asturiana coa escusa da crise
A formación política Compromisu por Asturies alertou sobre o “ataque brutal” que está sufrindo a lingua asturiana desde o Principado coa escusa da crise económica. Compromisu sinala que se rebaixaron en máis do 60 por cento as axudas que todos os anos se destinan á promoción lingüística.
Fonte: Europa Press
A Confederación Estatal de Persoas Xordas pídelle a Radio Televisión Española que inclúa a lingua de signos nas emisións
A Confederación Estatal de Persoas Xordas (CNSE) pediulle a RTVE que incorpore a lingua de signos ás súas emisións televisivas e cualificou de positivo, aínda que insuficiente, que a entrevista a Rubalcaba incorporase a interpretación só na web.
Fonte: Diario Vasco
Cataluña e o Concello francés de Tolosa cooperan para fomentar a lingua e a cultura occitanas
O Departamento de Cultura de Cataluña, o concello de Tolosa e a federación de entidades culturais Converxencia Occitana manterán unha reunión para estudar as posibles liñas de actuación para fomentar a lingua e a cultura occitanas, que se formalizará nun futuro convenio de colaboración permanente.
Fonte: Generalitat de Catalunya
O Goberno catalán promove proxectos empresariais que impulsen o uso do catalán
Por primeira vez este ano, a Generalitat de Cataluña convocou unha liña específica de subvencións, dotada con 200 000 euros, dirixida a iniciativas de empresas que promovan o uso da lingua catalá.
Fonte: Generalitat de Catalunya
A Fundación do Español Urxente e a Real Academia Española presentan un manual para escribir ben en internet
O futuro da lingua española “xógase en internet”. Con esta convicción, a Fundación do Español Urxente (Fundéu), asesorada pola Real Academia Española (RAE), publicou un manual con numerosas recomendacións para escribir correctamente na rede e aproveitar todas as súas posibilidades.
Fonte: 20 Minutos
España é o país da Unión Europea onde antes se comeza a aprender inglés
España é o país europeo no que antes se inicia o estudo dunha lingua estranxeira. Polo menos, en 10 das 17 comunidades onde o estudo doutro idioma se inicia aos tres anos, ao pisar a escola –algo que só sucede na comunidade xermanófona de Bélxica.
Fonte: El Mundo
Os colexios da Rexión de Murcia poderán ofertar o alemán como segunda lingua estranxeira
O Executivo rexional aprobou un decreto polo que se modifica parcialmente o currículo de Educación Primaria co obxectivo de ampliar a oferta dunha segunda lingua estranxeira nos centros educativos da rexión, que poderán ofertar o alemán.
Fonte: 20minutos
A organización Iniciativa polo Asturiano incorpórase a unha ONG europea de defensa das linguas minorizadas do continente
Co obxectivo de levar o conflito lingüístico asturiano a Europa, Iniciativa polo Asturiano vén de incorporarse a ELEN (European Lesser-Used Languages), unha ONG que traballa na promoción e protección das linguas europeas minorizadas.
Fonte: Asturies.com
Boletín
Subscríbase ao boletín
