A Concellería de Promoción Lingüística do Concello de Sueca puxo en marcha, un ano máis, varias iniciativas co obxectivo fundamental de promover o uso do valenciano. Unha delas é a publicación dunha axenda que contén as actividades e servizos que se levan a cabo desde este departamento, destinados á cidadanía do municipio, nun formato práctico e manexable.

Fonte: El Periodic

As solicitudes de inscrición de entidades ou de renovación da inscrición no Censo de entidades de fomento da lingua catalá poderanse tramitar electronicamente. A Dirección Xeral de Política Lingüística do Departamento de Cultura modificou a orde para permitir esta nova modalidade de tramitación. A tramitación electrónica facilitará a comunicación coas entidades interesadas e simplificará a achega de documentos.

Fonte: Generalitat de Cataluña

Con este novo plan, o Concello biscaíño de Iurreta dá luz verde ao cumprimento de varios obxectivos que se deberán desenvolver e materializar ata o 2017. Entre outras cuestións planéase facer un estudo sobre o uso do éuscaro no propio Concello, así como cuestións relacionadas coa normalización da lingua entre os veciños.

Fonte: Deia

Diferentes asociacións de produtores valencianas coincidiron en que sería viable abrir unha nova radiotelevisión pública en valenciano aínda que discreparon no modelo de traballadores, mentres que un experto en Dereito Administrativo validou a súa legalidade.

Fonte: La Vanguardia

Un total de 158 municipios dos 542 que forman parta da Comunidade Valenciana, é dicir un 30 %, contan xa con denominación oficial exclusivamente en valenciano, segundo os datos recollidos pola Dirección Xeral de Administración Local da Consellería de Presidencia e Agricultura, Pesca, Alimentación e Auga.

Fonte: Levante-emv

Iniciativa polo Asturiano fíxolle chegar á Casa do Rei a súa “queixa” porque “o xefe de Estado, Felipe VI, non usara o asturiano xunto ao resto das linguas do Estado” ao desexar Bo Nadal no seu discurso de Noiteboa.

Fonte: 20 Minutos

As asociación en defensa da lingua leonesa El Teixu, Furmientu e Faceira denuncian nun informe para o Consello de Europa que tanto o Estado como a Junta de Castela e León incumpren a Carta Europea das Lingua Rexionais ou Minoritarias.

Fonte: Ileón

A transmisión lingüística interxeracional do aranés está garantida aínda que adopta formas multilingües. Este feito explícase pola situación de multilingüismo que se vive neste territorio, onde poden distinguirse catro grupos lingüísticos: o 45,4 % identifícase co castelán; o 21,7 % co aranés, o 16,7 % co catalán e o 15,7 % con outras linguas.

Fonte: Generalitat de Cataluña

A viceconsellería de Política Lingüística do Goberno vasco destinará 45,6 millóns de euros para subvencionar sete convocatorias en distintos ámbitos e unha serie de axudas especiais para proxectos específicos. As partidas mantéñense na mesma liña có ano pasado, coa excepción dun aumento do 25 % nas subvencións individuais para o alumnado de euskaltegis.

Fonte: Noticias de Gipuzkoa

O Departamento de Cultura da Generalitat de Cataluña e o Departamento de Educación, Política Lingüística e Cultura do Goberno vasco asinaron un convenio de colaboración entre os seus centros de documentación especializados en aspectos sociais da lingua, considerados os máis importantes de toda Europa: o Centro de Documentación, da Dirección Xeral de Política Lingüística, por parte catalá, e HABE Liburutegia, por parte vasca.

Fonte: Generalitat de Cataluña