A Área de Éuscaro e Xuventude do Consistorio de Bilbao presentou a aplicación móbil Galdeketaun, deseñada pola web cultural www.nontzeberri.com e orientada a promover o uso da lingua vasca entre os adolescentes bilbaínos de 12 a 17 anos.

Fonte: El Correo

Un grupo de afeccionados vascos aos videoxogos crearon a comunidade Game Erauntsia, un espazo web para compartir a súa afección por este ocio electrónico, que ten como única premisa que os contidos e a comunicación entre os membros ten que ser en éuscaro.

Fonte: Vascopress

O viceconselleiro de Política Lingüística do Goberno vasco, Patxi Baztarrika, destacou que a saúde dixital do éuscaro é “boa”, como amosa, por exemplo, o feito de que actualmente se utilizan en internet só o 5 % das linguas do mundo e unha delas é o éuscaro. A pesar disto, afirmou que o reto debe ser “utilizar todos os produtos que as tecnoloxías da información e da comunicación (TIC) ofrecen e, en consecuencia, ampliar o mercado das TIC en éuscaro".

Fonte: 20 minutos

Acaba de facerse público o currículo aprobado para as ensinanzas de 0 a 3 anos en Asturias. O texto é, a xuízo de Iniciativa polo Asturiano, unha mostra de como a Administración asturiana fai todo o posible por expulsar a lingua asturiana do sistema educativo.

Fonte: Infoasturies

A Comisión de Cultura do Congreso rexeitou a proposición non de lei que lle pedía ao Goberno solicitar á Real Academia da Lingua Española o recoñecemento da lingua asturiana no seu dicionario.

Fonte: ABC

A Consellería de Educación estreou a súa nova ferramenta telemática para pulsar a opinión das familias. A aplicación debutou coa consulta non vinculante os pais sobre a lingua base (castelán ou valenciano) do modelo de ensino plurilingüe en Infantil e Primaria. Unha sondaxe na que votaron menos do 5 % dun censo composto polos proxenitores dos máis de 312 000 alumnos dos colexios públicos da Comunidade Valenciana.

Fonte: Levante-emv

Coa chegada do Nadal, a iniciativa Zinegabonak aterra un ano máis nas salas de cine vascas. Nesta segunda edición, tras o éxito obtido o ano pasado, o ciclo de cine en éuscaro dedicado aos mais pequenos chega renovado e con forza, co fin de “profundar, desenvolverse e expandirse”, explicou o viceconselleiro de Cultura, Xuventude e Deportes, Joxean Muñoz, no acto de presentación.

Fonte: Deia

O Consello de Goberno vasco aprobou unha Orde pola que se convocan subvencións, por un importe global de 146 250 euros, para realizar cursos de reforzo en lingua estranxeira en centros privados concertados e en centros públicos de titularidade municipal que imparten ciclos correspondentes ao curso 2014-2015.

Fonte: 20 minutos

Cos obxectivos de promover a euscaldunización do sur navarro e a de facilitar o consumo de produtos locais e impulsar a súa produción naceu o ano pasado a campaña de inverno de Errigora, que consiste na distribución e venda de cestas cheas de artigos gastronómicos da zona. Preto do 25 % da recadación destinarase á melloría da situación do éuscaro no sur de Navarra.

Fonte: Noticias de Navarra

A Fundación Caveda e Nava e SUATEA presentaron un informe á secretaria para a Carta Europea das Linguas rexionais ou Minoritarias do Consello Europeo documento que revisa o desenvolvemento das accións políticas e culturais das institucións para co asturiano entre 2010 e 2013, destacando deficiencias e incumprimentos gobernamentais ao respecto do pautado nesta Carta Europea.

Fonte: Asturnews