España
Escolas de seis localidades de Asturias poñerán en marcha un plan para que o asturiano sexa lingua vehicular
Escolas de seis localidades de Asturias estrearán no ano escolar 2017-2018 o Plan Piloto experimental de Promoción do Uso do Asturiano, que se poñerá en marcha no cuarto curso de Primaria destes centros educativos.
Fonte: Asturies.com
A Consellería de Educación da Comunidade Valenciana convoca axudas para o uso do valenciano na provincia de Alacant
A Consellería de Educación da Comunidade Valenciana convocou axudas para promover o uso da lingua valenciana en 50 municipios da provincia de Alacant. Estas axudas incrementáronse nun 11% respecto ao ano 2016 e superan o millón de euros para toda a Comunidade Autónoma.
Fonte: Diario Información
Ponse en marcha unha campaña para solicitarlles aos concellos que se dobren máis películas ao valenciano
A Plataforma pola Lingua comezou unha campaña na Comunidade Valenciana para fomentar, mesmo con mocións aos concellos, a dobraxe de producións audiovisuais ao valenciano e promover o seu uso entre o público máis novo.
Fonte: La Vanguardia
Convócanse as axudas Interlingua para fomentar as linguas no ámbito universitario de Cataluña
A Dirección Xeral de Universidades do Departamento de Empresa e Coñecemento, xunto coa Dirección Xeral de Política Lingüística de Cataluña, convocou as axudas Interlingua para fomentar o uso das linguas no eido universitario, especialmente do catalán, do occitano e da lingua de signos catalá.
Fonte: Generalitat de Catalunya
Máis de 6500 persoas adultas estudan éuscaro en centros públicos e euskaltegis de iniciativa social de Navarra
Durante o pasado curso 2016-2017, 6559 persoas adultas matriculáronse en cursos de éuscaro nas escolas oficiais de idiomas, nos euskaltegis públicos Zubiarte e nos de iniciativa social, o que supón un aumento de 275 persoas inscritas respecto ao curso anterior.
Fonte: Noticias de Navarra
O Goberno vasco apoia a educación en éuscaro no País Vasco francés
A conselleira vasca de Educación, Cristina Uriarte, e o conselleiro de Cultura e Política Lingüística, Bingen Zupiria, apoiaron a educación en éuscaro no País Vasco francés coa súa asistencia á inauguración do liceo Bernat Etxepare de Baiona.
Fonte: ABC
Demandan un único programa lingüístico para centros educativos que teña o valenciano como lingua vehicular
O Sindicato de Traballadores da Ensinanza do País Valenciano (STEPV) avoga por un programa lingüístico único para todos os centros educativos, públicos e privados, no que o valenciano sexa a lingua vehicular.
Fonte: La Vanguardia
Ábrese o prazo de inscrición para o curso de lingua de signos catalá para docentes
A Universidade Pompeu Fabra comeza o novo curso de lingua de signos catalá para docentes do ano académico 2017-2018, que terá lugar na Facultade de Tradución e Ciencias da Linguaxe. As persoas interesadas aínda poden inscribirse.
Fonte: Generalitat de Catalunya
A Dirección Xeral de Política Lingüística de Aragón explicará a súa política lingüística nas Cortes
O director xeral de Política Lingüística de Aragón, Xosé Ignacio López Susín, comparecerá nas Cortes a petición do PP e Ciudadanos. Na súa intervención, o director explicará a política lingüística do Goberno aragonés.
Fonte: El Periódico de Aragón
O Goberno do País Vasco detalla a evolución do éuscaro nunha xornada celebrada en Portugal
A directora de Promoción do Éuscaro do Goberno vasco, Estibaliz Alkorta, interveu nunha xornada sobre Política Lingüística organizada pola rede europea Cost, que tivo lugar en Coímbra (Portugal). Alí, a directora explicou a evolución da lingua vasca nas últimas décadas.
Fonte: La Vanguardia
Boletín
Subscríbase ao boletín
