Na inauguración da Feira do Libro da Coruña, que abriu as súas portas o 1 de agosto, participou o conselleiro de Cultura, Educación, FP e Universidades, quen salientou o bo momento do libro en galego, cun incremento superior ao 8 % na edición de exemplares nesta lingua e de case un 6 % nas vendas.

Fonte: Xornal da Coruña

Dentro da oferta formativa para o primeiro semestre do curso 2023/2024 inclúense cursos de galego para non galegofalantes (niveis básicos A1 e A2) que están abertos a calquera persoa interesada maior de 16 anos.

Fonte: Consello da Cultura Galega

Outorgaranse ata 600 euros para as mellores teses de doutoramento escritas en galego e ata 150 no caso dos Traballos Fin de Grao e Traballos Fin de Mestrado. Con esta iniciativa a Universidade de Vigo busca impulsar o uso desta lingua neste tipo de traballos.

Fonte: Universidade de Vigo

A Coordinadora de Traballadores/as de Normalización da Lingua recompilará na súa conta de Twitter, por segundo ano, recomendacións de lecturas, audiovisuais, webs de proxectos, campañas, xogos… baixo o cancelo #veránlingua.

Fonte: CTNL

A VI Xornada da Comisión Especializada de Nomes Xeográficos celebrarase na Cidade da Cultura o vindeiro 21 de setembro e nela reuniranse algúns dos maiores especialistas en toponimia e cartografía de España  para tratar a relación existente entre os nomes xeográficos e o mundo dixital.

Fonte: Real Academia Galega

A praza da Quintana e o parque de Bonaval de Santiago de Compostela acollerán o Trad Fest cunha selección de voces da música de raíz dos panoramas galego e internacional. En total haberá 12 horas ininterrompidas de música, baile, tradición e vangarda.

Fonte: Cultura galega

A Dirección Xeral de Patrimonio Cultural, dependente da Consellería de Cultura, Educación, FP e Universidades, informou favorablemente ao concello de Vigo sobre o plan presentado para a construción da nova biblioteca do estado na cidade.

Fonte: Xunta de Galicia

O circuíto das Feiras do Libro impulsado pola Xunta de Galicia e a Federación de Librarías chega a Rianxo con medio centenar de actividades para todos os públicos. A cita, instalada na praza de Castelao, é a décima parada desta ruta que ata o mes de agosto percorre 15 localidades.

Fonte: Cultura de Galicia

Máis dun cento de comunicacións presentáronse no LVII Congreso Internacional da Asociación Europea de Profesores de Español, AEPE, unha cita que ten lugar na Facultade de Filoloxía e Tradución da Universidade de Vigo e que reúne arredor de 130 docentes chegados de máis dunha vintena de países.

Fonte: DUVI

A actriz e xornalista Nerea Brey recibiu o premio Abrente de Textos Teatrais da Mostra Internacional de Teatro de Ribadavia pola súa obra Manual de patronaxe. Por outra banda, A Panadaría recibiu o premio do público pola súa peza As que limpan.

Fonte: Cultura galega