O gran reto, a webserie impulsada por Alingua na que tres persoas castelanfalantes asumiron o desafío de falar galego durante 21 días, mostra a experiencia de Darío, Martiña e Nelu que explican as súas conclusións, reflexións, atrancos, logros, reaccións das persoas do seu contorno…

Fonte: Concello de Narón

A Xunta crea unha nova liña de axudas para apoiar os creadores galegos no seu labor de difusión da cultura galega fóra da Comunidade e para impulsar as relacións de cooperación con outros organismos e centros culturais de referencia. Poderán participar ata o 31 de outubro escritores, tradutores, deseñadores gráficos ou ilustradores que deberán publicar despois a obra resultante en lingua galega.

Fonte: Xunta de Galicia

Convócase o XI Certame de monólogos cómicos en lingua galega 2023-24, unha iniciativa dirixida aos centros educativos da Coruña que ten como obxectivos fomentar o uso do galego entre o alumnado e potenciar a comprensión e a expresión oral, así como a creatividade neste idioma.

Fonte: Concello da Coruña

A Xunta destina 350 000 euros á promoción da lingua galega en 68 concellos e agrupacións locais a través dunha convocatoria de subvencións ás entidades locais de Galicia para fomentar a prestación dun servizo lingüístico e promover a planificación e o desenvolvemento de programas de dinamización da lingua galega este 2023.

Fonte: O Portal da Lingua Galega

Un total de 139 ciclos e mestrados de Formación Profesional desenvolverán parte do seu currículo nunha lingua estranxeira no curso 2023/24. A Xunta publicou a resolución definitiva pola que se autoriza un total de 67 ciclos formativos e 6 cursos de especialización plurilingües que comezan a partir de setembro en 26 centros educativos galegos.

Fonte: Xunta de Galicia

Un total de 12 creadores poderán participar nas residencias literarias na illa de San Simón que vén de convocar a Consellería de Cultura, Educación, FP e Universidades, unha das novas accións incluídas no Plan de impulso ao libro galego.

Fonte: Xunta de Galicia

A Deputación de Pontevedra repartirá 126 000 euros en axudas entre un total de 57 entidades culturais da provincia para promover, fomentar e difundir actividades de dinamización da lingua galega durante o exercicio 2023.

Fonte: Deputación de Pontevedra

A Xunta destina 200 000 euros á edición en lingua galega de recursos didácticos curriculares para niveis non universitarios este 2023. Así o recolle o Diario Oficial de Galicia, que acaba de publicar a resolución pola que se conceden estas subvencións aos 85 proxectos editoriais seleccionados.

Fonte: O Portal da Lingua Galega

A Xunta acaba de convocar por un importe total de 261 360 € un total de 11 bolsas de formación nos proxectos de investigación que se desenvolven no Centro Ramón Piñeiro para a Investigación en Humanidades, dependente da Consellería de Cultura, Educación, Formación Profesional e Universidades.

Fonte: O Portal da Lingua Galega

Lourenzá acollerá do 4 ao 6 de setembro un encontro no que se afondará no legado do protagonista do Día das Letras Galegas 2023 dende diversas perspectivas.

Fonte: Real Academia Galega