A Real Academia Galega e a Asociación PuntoGal presentaron a segunda convocatoria do certame de microrrelatos co que buscan aumentar a presenza da lingua galega na rede. As persoas interesadas en participar deberán enviar ao longo do mes de febreiro os seus textos, de ata 200 palabras e en galego, e as que gañen o concurso recibirán premios tecnolóxicos e relacionados coa lectura.

Fonte: Real Academia Galega

Os Premios Min contan cunha categoría de mellor álbum en galego, na que é posible votar ata por cinco dos doce discos presentados, pertencentes a unha gran variedade de estilos musicais diferentes. Pasada esta fase de votacións populares, os cinco máis votados serán semifinalistas, entre os que un xurado profesional escollerá os finalistas e, posteriormente, os vencedores.

Fonte: Consello da Cultura Galega

A Mesa pola Normalización Lingüística envioulle unha carta ao presidente da Xunta de Galicia para pedirlle que se atendan as recomendacións recollidas no informe preliminar da ONU no que se denuncian vulneracións dos dereitos lingüísticos dos galegofalantes.

Fonte: Galicia Confidencial

Segundo os datos do Barómetro de Hábitos de Lectura e Compra de Libros,  só o 4% das persoas escolle o galego como lingua de lectura. Por este motivo, a Asociación Galega de Editores (AGE) demanda políticas efectivas e transversais para fomentar a lectura neste idioma.

Fonte: Semos Galiza

O novo volume La letteratura galega. Autori e testi verte ao italiano medio cento de textos arredor doutras tantas figuras das Letras Galegas, da man dos tres Centros de Estudos Galegos (CEG) italianos -Padua, Roma e Perugia- da Rede de Lectorados e Centros de Estudos Galegos e no marco da colección Finisterrae, coa colaboración da Secretaría Xeral de Política Lingüística e da Real Academia Galega (RAG).

Fonte: O Portal da Lingua Galega

A praza do Concello de Salceda da Caselas, acolleu a presentación de dous volumes, titulados Descricións e Catálogo, editados pola Deputación de Pontevedra, que recollen a tradición oral deste municipio.

Fonte: Deputación de Pontevedra

Co gallo da celebración o 14 de febreiro do Día de San Valentín, Radio Estrada convoca a terceira edición do seu concurso de cartas de amor que ten como obxectivo fomentar a escritura en galego, tanto en prosa como en verso, e a reflexión sobre os distintos tipos de amor.

Fonte: La Voz de Galicia

O secretario xeral de Política Lingüística, Valentín García, participou, nos xardíns situados fronte á Facultade de Belas Artes de Pontevedra, na celebración do Día da Galeguidade Empresarial, que este ano o Foro Enrique Peinador lle dedica ao empresario, artista e intelectual Isaac Díaz Pardo e que conta co apoio da Xunta de Galicia.

Fonte: O Portal da Lingua Galega

Valentín García, secretario xeral de Política Lingüística, e Manuel Corredoira, director xeral de Educación, Formación Profesional e Innovación Educativa, inauguraron no Pazo de San Roque a xornada formativa para profesorado pertencente a equipos de dinamización da lingua galega (EDLG) “Sumando espazos, espallando lingua”.

Fonte: O Portal da Lingua Galega

A Xunta de Galicia, a través das consellerías de Cultura e Turismo e de Educación, Universidade e Formación Profesional, convoca, por medio da publicación de dúas ordes da Secretaría Xeral de Política Lingüística no Diario Oficial de Galicia (DOG), as axudas para o fomento da lingua galega no ensino, tanto para centros de titularidade pública como para centros de titularidade privada.

Fonte: O Portal da Lingua Galega