O filme brasileiro dirixido por Walter Salles, Ainda estou aqui, protagonizado por Fernanda Torres, non conseguiu o premio na categoría de Mellor filme en lingua non inglesa nos Globos de Ouro, sendo superado pola produción francesa Emilia Pérez. A pesar diso, 'Ainda estou aqui' xa acumula sete premios internacionais, incluíndo Mellor guión no Festival de Venecia, e Fernanda Torres foi recoñecida como Mellor actriz, todo un triunfo para o cinema en lingua portuguesa.

Fonte: Terra

Cada ano pérdense linguas en todo o mundo, cunha taxa de desaparición que se acelera. Activistas en todo o mundo están a empregar ferramentas en liña para preservar estas linguas ameazadas, documentando e rexistrando palabras, significados e usos para manter vivas os modos de expresión e as tradicións culturais asociadas.

Fonte: The Guardian

O Día Mundial do Hindi celébrase cada 10 de xaneiro para promover o uso global desta lingua, unha das máis faladas do mundo. A celebración busca destacar a diversidade lingüística da India e a unidade que xorde dela, especialmente nas rexións do norte onde o hindi é amplamente falado. 

Fonte: ETV Bharat

A disciplina de portugués como lingua non materna (PLNM) en Portugal atende 14 000 estudantes, representando o 12 % do total de alumnado estranxeiro no país. O Consello de Educación considera que reforzar o portugués é unha "medida de inclusión esencial" e recoñece que a oferta actual non cobre as necesidades reais.

Fonte: Público

O Goberno da RAEM (Região Administrativa Especial de Macau) asegura que os servizos públicos cumpren de forma rigorosa a normativa sobre o uso das linguas oficiais, o portugués e o chinés, e garanten o servizo nas linguas elixidas pola cidadanía.

Fonte: Ponto Final

«Liberdade» foi elixida a Palabra do Ano 2024 en Portugal co 22 % dos votos obtidos nunha consulta organizada pola Porto Editora. A escolla fai referencia ao 50 aniversario da Revolución do 25 de Abril, que se conmemorou ao longo de 2024 con diversas actividades culturais e sociais.

Fonte: Público

O Goberno de Andorra ampliará a formación en catalán para facilitar a renovación dos permisos de residencia coa incorporación dun novo curso de 30 horas de nivel A1.1. A partir de xaneiro, ofreceranse 43 cursos presenciais e gratuítos, ademais de autoaprendizaxe guiada e formación virtual para preparar os exames oficiais. Desde 2026, será obrigatorio acreditar niveis específicos de catalán para renovar as autorizacións de residencia. A medida inclúe un período transitorio ata abril de 2026 para completar a formación inicial.

Fonte: Vilaweb

O Centro de Linguas da Universidade Intercultural do Estado de Hidalgo fomenta a conservación, difusión e aplicación profesional das linguas orixinarias como o náhuatl, tepehua e otomí, xunto co inglés. Desde 2012, ofrece estes idiomas no seu currículo para estudantes de comunidades que aínda conservan estas linguas. A institución tamén promove o intercambio de ideas entre o alumnado e busca converterse nun centro de profesionalización e avaliación das linguas indíxenas.

Fonte: AM

A guía Noms dels municipis i gentilicis de la Catalunya del Nord recolle e fixa os xentilicios de 198 municipios da Cataluña Norte coa grafía catalá correcta. A súa finalidade é establecer formas consolidadas que preserven a tradición local e evitar termos desvirtuados. A publicación está dispoñible en liña, cun mapa interactivo e gravacións para escoitar a pronunciación dos nomes.

Fonte: Diari de la Llengua

Grupos de defensa da lingua galesa esíxenlle ao Goberno de Gales que aumente as iniciativas para expandir o uso do galés, especialmente en áreas urbanas e entre a mocidade, co obxectivo de revitalizar e asegurar o futuro da lingua e chegar ao millón de falantes.

Fonte: Morning Star