A Unesco e a Corporación de Internet para a Asignación de Nomes e Números (ICANN, polas súas siglas en inglés) uniron forzas para fomentar a diversidade lingüística na rede, facilitando o acceso a contidos en diferentes idiomas e garantindo a preservación das linguas maternas no ámbito dixital.

Fonte: Central Charts

O goberno de Angola aprobou un paquete lexislativo que recoñece a lingua portuguesa, as linguas angolanas de orixe africana, a lingua de signos angolana e o sistema braille como linguas do país. Esta iniciativa busca promover a equidade lingüística e fomentar unha política inclusiva que reflicta a diversidade cultural de Angola.

Fonte: Diário de Notícias

O goberno de Timor Leste aproba un orzamento superior a 155 000 dólares destinado a promover a lingua portuguesa no país. Esta medida inclúe a difusión do portugués a través de medios de comunicación e a formación de profesionais.

Fonte: Observador

O Comité Económico e Social Europeo (CESE) aprobou o uso do galego, o catalán e o éuscaro nas súas sesións plenarias, equiparándose así ao Consello da UE e ao Comité Europeo das Rexións. O Goberno español celebra esta decisión e continúa impulsando a oficialización destas linguas na UE, proceso que require unanimidade dos 27 Estados membros. Tamén solicitou ao Parlamento Europeo que permita o seu uso nos plenos, pendente de aprobación.

Fonte: Press Digital

A Cidade de México anunciou que 78 escolas secundarias ofrecerán clases de náhuatl. Esta medida, que busca preservar as linguas indíxenas e o patrimonio cultural e lingüístico da sociedade mexicana, debería ser implementada no futuro en todo o país.

Fonte: El Ciudadano

O director do Instituto de Lingüística Yakub Kolas da Academia Nacional de Ciencias de Bielorrusia informou de que o país eslavo está a utilizar tecnoloxías de intelixencia artificial para avanzar na lingüística e promover o uso do idioma bielorruso.

Fonte: TV Brics
 

As autoridades costarriqueñas implementaron un programa que permite aos indíxenas miskitos de Nicaragua solicitar refuxio en Costa Rica por medio da súa lingua materna. Esta iniciativa busca facilitar o proceso de asilo para esta comunidade, respectando e preservando a súa identidade cultural e lingüística.

Fonte: Swissinfo

O alcalde de Bos Aires, Jorge Macri, anunciou que o guaraní será impartido nas escolas primarias da cidade. Este anuncio realizouse durante a inauguración do curso escolar 2025, tras unha reunión co presidente paraguaio, Santiago Peña. A medida busca recoñecer a conexión coa numerosa comunidade paraguaia en Bos Aires e promover a lingua dos seus devanceiros.

Fonte: MercoPress

O presidente do Brasil e o primeiro ministro de Portugal asinaron un acordo para que o Instituto Guimarães Rosa e o Instituto Camões asuman o compromiso de converter o portugués en lingua de traballo da ONU.

Fonte: Público

A Presidencia da República de Cabo Verde anunciou a tradución da Constitución da República á lingua caboverdiana, na variante de Santiago. O proxecto, presentado polo lingüista e escritor Manuel Veiga, conta co patrocinio do presidente José Maria Neves e será lanzado o 6 de marzo, no marco das celebracións do 50º aniversario da independencia nacional.

Fonte: Expresso das Ilhas