A Biblioteca do Congreso dos Estados Unidos albergou a presentación do Gran Dicionario Monlam da Lingua Tibetana, unha obra lexicográfica de 223 volumes que axudará a preservar o idioma tibetano fronte ás políticas de asimilación cultural promovidas por China.

Fonte: Radio Free Asia

Como cada 18 de decembro, as Nacións Unidas conmemoran en todo o mundo o Día Internacional da Lingua Árabe, un dos idiomas oficiais deste organismo internacional. O lema deste ano é "Lingua Árabe e IA: Avanzando na innovación mentres se preserva o patrimonio cultural".

Fonte: United Nations

A política lingüística de Estonia quedará centralizada nunha única responsable: Kairi Kaldoja, recentemente designada como secretaria xeral adxunta de política lingüística no Ministerio de Educación e Investigación.

Fonte: ERR

A Asociación da Lingua Mirandesa publicou o primeiro libro electrónico en mirandés, unha transcrición de contos dun podcast que busca facer a lingua accesible a persoas con limitacións auditivas e visuais.

Fonte: Notícias ao Minuto

O Tribunal de Apelación de Tolosa de Linguadoc, Francia, confirmou a prohibición de empregar unicamente ou de xeito prioritario o catalán nos plenos municipais de cinco concellos da Cataluña Norte. 

Fonte: La Semaine du Roussillon

A mocidade alemá elixiu "Aura" como a palabra do ano 2024. O anuncio tivo lugar na Feira do Libro de Frankfurt. Esta palabra úsase como unha expresión positiva para describir algo "guai" ou para mostrar aprobación a alguén por realizar boas accións.

Fonte: DW

A Comunidade de Países de Lingua Portuguesa (CPLP) organiza en Berlín unha feira do libro con máis de 400 títulos de autores de lingua portuguesa e as súas respectivas traducións ao alemán.

Fonte: TSF Rádio Notícias

Nace a plataforma dixital Perlina TV co obxectivo de ofrecer un espazo para que as nenas e os nenos de Malta aprendan a lingua maltesa.

Fonte: Times of Malta

A editorial Companhia das Letras anunciou que a obra completa de Clarice Lispector, considerada unha das máis importantes figuras da literatura lusófona contemporánea, vai ser publicada a partir do próximo ano 2025 en Portugal.

Fonte: Notícias ao Minuto

Un estudo elaborado por investigadores da Universidade de Australia Meridional conclúe que manter bos hábitos de sono pode potenciar as nosas habilidades lingüísticas. O descanso adecuado contribúe de forma significativa a almacenar e consolidar o vocabulario aprendido, mellorando así a capacidade de memorización e uso de novas palabras.

Fonte: SciTechDaily