A partir do curso 2026/2027, o sistema educativo luxemburgués implementará progresivamente a opción de alfabetización en francés ensino preescolar, complementando a actual en alemán. Esta medida busca facilitar a aprendizaxe dos fillos e fillas de inmigrantes de fala francesa e estará en pleno funcionamento para o curso 2030/2031.

Fonte: Contacto

O Diario da República de Portugal comezará a publicar documentos en mirandés grazas a un protocolo asinado entre o municipio de Miranda do Douro, a Casa da Moeda e a Asociación da Lingua e Cultura Mirandesas. Este acordo busca dignificar e recoñecer o segundo idioma oficial de Portugal.

Fonte: Mensageiro de Bragança

O Ministerio de Educación da India informou de que, segundo a Política Nacional de Educación (NEP), non se lles imporá ningunha lingua aos estados. As tres linguas que os estudantes aprendan serán elixidas polos estados e o propio alumnado, garantindo así a flexibilidade e o respecto ás linguas rexionais.

Fonte: The Pinnacle Gazette

O Concello de Leiria implantou un novo servizo de interpretación en lingua de signos portuguesa para mellorar o acceso da comunidade xorda aos servizos municipais. O sistema funciona nos días laborables e permite que as persoas con discapacidade auditiva reciban asistencia na súa comunicación coas institucións locais.

Fonte: Sapo

Miles de persoas manifestáronse en Perpiñán para pedir máis apoio das autoridades francesas ás escolas inmersivas en lingua catalá da Cataluña Norte, que atravesan unha grave crise económica. Baixo o lema "Bressola viva, lingua viva", a marcha percorreu o centro da cidade, onde se escoitaron consignas a favor do ensino en catalán.

Fonte: Diari de la Llengua

Claire Hanna, líder do Partido Social Demócrata e Laborista de Irlanda do Norte, marcou un fito histórico ao empregar o irlandés durante a sesión de preguntas ao primeiro ministro no Parlamento británico. Coincidindo co día de San Patricio, Hanna abriu a súa intervención cun saúdo en irlandés, subliñando a relevancia de preservar e celebrar a lingua e a cultura irlandesas a nivel global.

Fonte: Irish Central

Coincidindo coa presidencia polaca da Unión Europea, Euronews inaugurou o seu servizo de noticias en polaco, unha iniciativa que brindará unha oportunidade única para analizar o papel de Varsovia na configuración do futuro de Europa.

Fonte: Euronews

Nos últimos 20 anos, a ensinanza en éuscaro en Iparralde medrou de forma notable. O número de escolas con educación bilingüe aumentou considerablemente, e cada vez máis centros apostan pola inmersión lingüística, fortalecendo así a presenza do éuscaro no sistema educativo e, por extensión, na sociedade.

Fonte: Ehige

O crecemento do uso do francés e do inglés en Benín está a provocar a desaparición progresiva das linguas autóctonas. A percepción de que estes idiomas estranxeiros ofrecen mellores oportunidades laborais fai que as novas xeracións se distancien da súa identidade lingüística e cultural.

Fonte: Global Voices

O goberno portugués aprobou en Consello de Ministros a creación dunha misión dedicada á protección e promoción da lingua mirandesa. Esta entidade, con sede en Miranda do Douro, operará até 2028 e busca garantir recursos para a preservación desta herdanza cultural única, aumentar a súa visibilidade e promover a transmisión interxeracional.

Fonte: Observador