O estado de California abriu un novo centro de certificación en San Diego co obxectivo de incrementar o número de profesores de portugués nas escolas públicas. A iniciativa busca identificar docentes doutras disciplinas que falen portugués e estean interesados en obter unha credencial adicional para ensinar o idioma, fortalecendo así a oferta educativa en linguas estranxeiras.

Fonte: Diário de Notícias

Un estudo lingüístico revela novas evidencias sobre a orixe común das linguas italo-celtas e greco-armenias. Os achados achegan unha maior comprensión sobre a evolución das linguas indoeuropeas e os seus nexos históricos.

Fonte: La Brújula Verde

A Fundación Nacional dos Pobos Indíxenas do Brasil (Funai) apoiou un campionato no estado de Amazonas dedicado ao pobo kokama, co obxectivo de preservar e fortalecer a súa lingua e cultura. A iniciativa é un exemplo do compromiso coas comunidades indíxenas e a súa herdanza cultural, promovendo a súa visibilidade e continuidade.

Fonte: Gov.br

A recente lexislación en Irlanda fortalece os dereitos lingüísticos dos falantes de irlandés, impoñendo obrigas aos organismos públicos para utilizar o gaélico en comunicacións oficiais.

Fonte: Connacht Tribune

O número de estudantes de español como lingua estranxeira incrementouse case un 11 % desde 2018, alcanzando os 24,2 millóns en todo o mundo, segundo datos do Instituto Cervantes.

Fonte: Europa press

A falta de recoñecemento oficial está a pór en perigo a profesión de intérprete de lingua de signos en Angola. Esta situación vai ter un impacto negativo na inclusión das persoas con discapacidade auditiva no país africano.

Fonte: Saúde Mais

En Lituania, o interese polo idioma español está en auxe, con cada vez máis estudantes desexando aprendelo. Con todo, as escolas están a ter dificultades para atopar profesorado cualificado que satisfaga esta crecente demanda.

Fonte: LRT

A exposición On the National Language: The Poetry of America’s Endangered Tongues (Sobre a lingua nacional: A poesía das linguas ameazadas dos EUA), do artista e xornalista B.A. Van Sise, inclúe 50 retratos que destacan o papel esencial das linguas indíxenas na identidade cultural. A obra subliña a urxencia de protexelas e revitalizalas para preservar a riqueza do pensamento humano.

Fonte: El País

En Goa, o interese pola cultura e lingua portuguesas aumentou, especialmente entre os habitantes locais, que son cada vez máis conscientes da riqueza da cultura indo-portuguesa. O número de estudantes da lingua portuguesa tamén se incrementou grazas a iniciativas como a Fundación Oriente e o Instituto Camões.

Fonte: Notícias ao Minuto

A Asociación da Lingua e Cultura Mirandesas xa organizou dez cursos en liña para aprender mirandés, con participantes de todos os continentes. Este esforzo busca revitalizar a segunda lingua oficial de Portugal, cuxo futuro está ameazado, segundo estudos recentes.

Fonte: Rádio Brigantia