O primeiro ministro de Timor Leste, Rui Maria de Araújo, quere converter o portugués na primeira lingua máis falada do país asiático. Actualmente o tetún é o idioma principal do país.

Fonte: Agência Brasil

Organizacións a favor da lingua serbia de Montenegro defenden que o Ministerio de Educación de Montenegro é partidario dunha imposición do montenegrino e do alfabeto latino nas escolas.

Fonte: Balkan Insight

O municipio alentexano de Almodôvar organiza o festival "Escritas do Sul" co que pretende promover a lingua portuguesa por medio de conferencias, obradoiros e outras iniciativas ao longo de cinco días.

Fonte: Sulinformação

A editorial de literatura en lingua occitana Letras d'Òc acaba de convocar a segunda edición do premio de tradución ao occitano de obras non francófonas. A obra gañadora recibirá un premio de mil euros.

Fonte: Jornalet

A ministra de Educación de Dinamarca, Ellen Trane Nørby, declarou que o país nórdico pretende introducir un programa de clases de dinamarqués para nenos a partir dos dous anos de familias orixinarias doutros países.

Fonte: Independent

O Goberno de Gales quere inspirarse nas políticas de protección e promoción do éuscaro no País Vasco para o desenvolvemento dunha planificación lingüística que permitirá chegar ao millón de falantes de galés.

Fonte: Euskadi

Unha enquisa realizada por un sindicato educativo do País de Gales revela que moitos dos novos libros que se deberían empregar este ano no ensino secundario non están aínda traducidos ao galés. Esta situación resulta discriminatoria para o alumnado que cursa todas as materias en lingua galesa.

Fonte: BBC

O partido portugués Bloco de Esquerda quere mellorar a inclusión e a integración da comunidade de xordos e propuxo con este fin que a lingua de signos poida ser ensinada nas escolas como actividade extraescolar.

Fonte: RTP

Turquía quere aprobar medidas no ámbito da educación que permitirán que os escolares de quinto ano do ensino elemental poidan ter docencia en linguas como o turco, o inglés, o alemán, o francés e o árabe.

Fonte: Hurriyet Daily News

A Universidade Aberta Indira Gandhi (Indira Gandhi National Open University) da India ofrecerá estudos a distancia de cultura e lingua coreanas.

Fonte: The Korea Times