Un deputado mexicano promoveu unha iniciativa para reformar a Constitución co obxectivo de recoñecer as linguas indíxenas como oficiais en México, igual que o español.

Fonte: UniRadio Informa

O Día Mundial do Braille instaurouse no ano 2000 co obxectivo de concienciar sobre a integración das persoas con discapacidade visual. Celébrase o 4 de xaneiro, data que coincide co aniversario do nacemento do seu creador, Louis Braille.

Fonte: Diario de Morelos

A nova Lei de nacionalidade fai máis difícil conseguir o pasaporte suízo. As persoas candidatas á súa obtención deben dominar a lingua local (francés, alemán ou italiano, segundo a rexión), xa que deben estar en posesión do nivel A2 para escritura e B1 para oralidade.

Fonte: SwissInfo

A ministra de Asuntos Exteriores da India, Sushma Swaraj, declarou que o seu país está listo para afrontar os custos que suporá que a lingua hindi se converta nun dos idiomas oficiais das Nacións Unidas.

Fonte: Wiki Tribune

A festa das ikastolas do País Vasco francés, Herri Urrats, terá lugar o 13 de maio de 2018 en Senpere baixo o lema 'Prefosta'. Os beneficios deste ano destinaranse ao colexio Manex Erdozaintzi Etxart, que une a alumnado de Zuberoa e Baixa Navarra.

Fonte: eitb.eus

Unha descendente de portugueses crea "Mais idiomas", unha academia virtual de aprendizaxe de idiomas centrada na promoción da lingua e cultura portuguesas.

Fonte: Notícias ao Minuto

A Sociedade da Lingua Galesa (Cymdeithas yr Iaith Gymraeg) criticou con dureza o escaso uso que se fai da lingua galesa na Asemblea de Gales. Segundo as estimacións da organización, o galés é a lingua dos debates só un 12 % do tempo.

Fonte: BBC

A Estratexia da Lingua Gaélica, consensuada polas comunidades de fala irlandesa que viven na zona sur do Condado irlandés de Donegal, permitirá garantir un futuro prometedor para o gaélico irlandés.

Fonte: Donegal Democrat

Unha empresa da Rexión Autónoma chinesa de Mongolia Interior acaba de crear un método de entrada que permitirá por primeira vez que os falantes de mongol poidan empregar a súa lingua en liña.

Fonte: Xinhua Net

O presidente de Casaquistán, Nursultan Nazarbayev, declarou nun discurso oficial que aprender ruso continúa sendo importante para a república centroasiática.

Fonte: TASS