A Universidade de Massachusetts, na cidade de Lowell, Estados Unidos, está a unir esforzos para dar inicio a unha licenciatura en portugués. A institución de ensino declarou que, ao longo dos próximos tres anos, profesores portugueses serán convidados para desenvolver o programa.

Fonte: A Bola

Dúas asociacións de defensores da lingua irlandesa presentaron unha carta conxunta no Parlamento de Irlanda do Norte en Stormont para demandar un trato xusto e respecto cara á lingua irlandesa despois das últimas mostras de desprezo dalgúns deputados da cámara.

Fonte: BBC

Un estudo recente do Centro Ruso de Análise da Opinión Pública revelou que o 92 % dos rusos recoñece a necesidade de aprender linguas estranxeiras na escola. O inglés, o alemán e o chinés lideran os cursos de linguas estranxeiras entre a poboación.

Fonte: Gazeta Russa

Ao longo dun ano, o Instituto Goethe debateu o futuro da lingua alemá na iniciativa Alemán 3.0. Segundo o secretario xeral desta institución, Johannes Ebert, os debates evidenciaron a importancia do multilingüismo en Europa, especialmente en Alemaña, que é un país de inmigración e defendeu que dominar o idioma continúa sendo fundamental para a integración profesional e social dos traballadores estranxeiros.

Fonte: DW

Un informe elaborado polo Comisariado de Linguas Oficiais do Canadá defendeu que o Goberno federal debe ter en conta a realidade das comunidades francófonas á hora de elaborar as súas políticas en materia de inmigración. O documento mostra un desequilibrio respecto á lingua falada polos cidadáns doutros países que chegan ao Canadá e insta o Goberno a corrixilo.

Fonte: La Presse

O poeta galego, Elías Portela, puxo rumbo hai 13 anos cara a Reiquiavik cunha bolsa Erasmus e hoxe é un dos compositores líricos máis representativos da cultura islandesa. Baixo o pseudónimo de Knörr fixo camiño na literatura nacional do país. Tanto é así que a que era primeira ministra Jóhanna Sigurðardóttir dixo que a súa obra Sjóarinn með Morgunhestana undir Kjólnum (O mariñeiro con cabalos matutinos baixo o vestido) era das súas favoritas. O seu traballo estendeuse por todo o país grazas á difusión das redes sociais e á aparición nunha prestixiosa revista nacional.

Fonte: Praza Pública

O antigo presidente da República de Portugal, Jorge Sampaio, considerou na sesión de apertura das Conferencias de Lisboa que a Comunidade de Países de Lingua Portuguesa (CPLP) "podía aproveitar mellor" o feito de ter unha lingua común, defendendo máis políticas concertadas de cooperación para o desenvolvemento.

Fonte: Notícias ao Minuto

Qiu Yuanping, xefa da Oficina de Asuntos Chineses no Estranxeiro do Consello de Estado de China, declarou, con motivo dunha conferencia, que o país asiático formará 30 000 docentes de chinés como lingua estranxeira antes de finais de 2017 co fin de fomentar a lingua e cultura chinesas no estranxeiro.

Fonte: Business Standard

O Consello Nacional de Educación de Turquía presentou unha proposta que pretende introducir materias de lingua turca otomá nos centros de ensino secundario. A iniciativa orixinou un importante debate sobre a necesidade de aprender esta lingua e algúns membros declararon que esta opción debe ser opcional e non obrigatoria.

Fonte: Hurriyet Daily News

Unha empresa de nova creación da Universidade do Miño (Portugal) está a desenvolver un tradutor para a lingua de signos portuguesa que poderá axudar a resolver moitos dos problemas cos que se atopan no seu día a día os cidadáns xordos portugueses.

Fonte: Correio do Minho