Os órganos públicos da República de Irlanda non contan con suficiente persoal que poida desempeñar as súas funcións por medio da lingua irlandesa, revelou un informe dun departamento gobernamental. A falta de habilidades lingüísticas de irlandés demostra que a administración pública non pode cumprir a norma do Tribunal Supremo da República de Irlanda que establece que todos os cidadáns teñen o dereito a realizar calquera trámite administrativo en irlandés.

Fonte: Independent

O Instituto Camões está a seleccionar 15 profesores portugueses para integraren un proxecto de cooperación con Timor Leste destinado á formación de docentes de ensino básico, na área de lingua portuguesa, que ofrece unha remuneración bruta superior a 3500 euros.

Fonte: SIC Notícias

A Oficina Federal de Política Exterior de Alemaña e o servizo de noticias Deutsche Welle asinaron un acordo para crear un novo servizo multimedia en linguas estranxeiras que ofreza noticias diarias desde unha perspectiva alemá. O contido das noticias será publicado en alemán, inglés, español e árabe.

Fonte: Deutsche Welle

En 2012, a cidade romanesa de Cluj-Napoca foi designada Capital Europea da Xuventude 2015. Emil Boc, alcalde da cidade e o embaixador francés en Romanía, François Saint Paul, asinaron un protocolo que acordou converter o francés en lingua oficial do proxecto de capitalidade. Isto significa que todos os eventos que se organizarán o próximo ano serán comunicados tamén en francés.

Fonte: Romania-Insider

A versión portuguesa do xornal dixital Diário do Povo foi concibida para fornecer información sobre os ámbitos da política, a economía, a sociedade, a educación, a ciencia, a cultura e o turismo aos lectores de zonas onde se fale o portugués, co fin de construír unha nova plataforma para a comprensión mutua e o intercambio de internautas de China e os países lusófonos.

Fonte: People Daily

A palabra do ano 2014 en Portugal é "corrupção". A escolla foi feita polos internautas portugueses por medio de votación directa no sitio Infopédia.pt durante todo o mes de decembro pasado. En segundo lugar ficou a palabra "xurdir" e en terceiro lugar a palabra "selfie".

Fonte: Diário Digital

A lingua portuguesa foi excluída da páxina oficial da FIFA desde o inicio do ano 2015 e deixa sen contidos nesta lingua a máis de 200 millóns de persoas que teñen o portugués como lingua nativa no mundo. Actualmente, a páxina publica contidos en inglés, francés, español, alemán e árabe.

Fonte: Sapo

A organización non gobernamental ADLML (Asociación de Desenvolvemento Local do Miño-Lima), con sede no Porto, vai ensinar este ano a lingua portuguesa a 450 traballadores da Guinea Ecuatorial, nun proxecto sobre o ámbito da formación profesional.

Fonte: Porto Canal

Sete programas en 66 países do mundo conforman o plan de acción cultural externa do Instituto Camões da Cooperación e da Lingua Portuguesa en 2015, que presentou en Lisboa a súa presidenta, Ana Paula Laborinho.

Fonte: Visão

O lingüista Christopher Moseley elaborou recentemente un mapa detallado das linguas europeas en perigo de extinción. Son idiomas falados, en moitos casos, por menos de dez persoas e este ano 2015 poderían ser testemuñas da súa desaparición, porque os seus falantes xa son moi vellos.

Fonte: Vilaweb