Aragón
Preséntanse nas Cortes de Aragón novas iniciativas para o impulso do aragonés
A Chunta Aragonesista propón máis mecanismos para fomentar o uso social das linguas propias de Aragón. Así mesmo, este partido informou de que fará emendas ao proxecto de Lei de aprendizaxe ao longo da vida adulta en Aragón.
Fonte: Aragón Digital
O Goberno de Aragón pon en marcha unha plataforma para compartir información sobre o aragonés
Esta plataforma pretende converterse nun punto de encontro e intercambio para todos os adheridos ao programa Agora x l'aragonés, unha iniciativa que ten como obxectivo fomentar o uso desta lingua.
Fonte: El Periódico de Aragón
A Chunta Aragonesista presenta unha proposta ante o Senado para apoiar o aragonés
A Chunta Aragonesista trasladoulle á Cámara Alta unha proposta para conseguir o recoñecemento profesional dos docentes que imparten a especialidade de aragonés na educación obrigatoria.
Fonte: 20minutos
O III Premio “Pedro Lafuente” en aragonés abre o seu prazo de participación
O Concello de Huesca convoca a terceira edición do Premio “Pedro Lafuente”, na que haberá tres categorías: un premio de narración curta; o premio“Zagals”, para obras en aragonés realizadas por nenas e nenos de 3 a 12 anos; e o “Bota d’Oro”, para a mellor campaña de fomento do aragonés na cidade desenvolvida por persoal de establecementos comerciais e hostaleiros.
Fonte: Ara Info
O Goberno de Aragón celebra o I Concurso Antonio Artero de vídeo en lingua aragonesa
As bases deste concurso publicáronse no Boletín Oficial de Aragón. Nelas explícase que cada persoa poderá presentar ata cinco obras en versión orixinal e inédita, de tema libre e cunha duración máxima de cinco minutos.
Fonte: 20 minutos
A comarca aragonesa do Bajo Cinca pon en marcha un programa para fomentar a lectura en catalán
A comarca aragonesa do Bajo Cinca asinou un acordo co Departamento de Educación, Cultura e Deporte do Goberno aragonés, polo cal recibirá unha subvención de 5000 euros para financiar actividades de promoción e dinamización social e cultural da lingua catalá.
Fonte: Heraldo
A cidade de Zaragoza recupera o nome histórico en aragonés nas rúas do Arrabal
O barrio do Arrabal de Zaragoza xa conta cunha nova placa na que figura a denominación tradicional: carrera Navaters de Roncal. Esta modificación súmase a outros quince nomes históricos que recuperan referencias a actividades e topónimos altoaragoneses.
Fonte: El Periódico
O Goberno de Aragón regula a certificación do coñecemento do aragonés segundo o marco común europeo de referencia para as linguas
A Dirección Xeral de Política Lingüística publica unha orde para obter os certificados dos niveis A2, B1 e B2 de comunicación e competencia do aragonés, de maneira que, por primeira vez, se regulará o coñecemento deste idioma segundo o marco común europeo de referencia para as linguas (MCERL).
Fonte: Aragón Hoy
O Goberno de Aragón destina 30 000 euros á Universidade de Zaragoza para fomentar a investigación en linguas minoritarias
O Goberno de Aragón e a Universidade de Zaragoza asinaron un convenio de colaboración para a constitución da cátedra Johan Ferrández d’Heredia de Linguas Propias de Aragón e Patrimonio Inmaterial Aragonés cuxa finalidade é afondar no seu coñecemento científico.
Fonte: El Periódico de Aragón
Unha campaña recolle sinaturas a favor da oficialidade do catalán en Aragón
Un grupo de particulares aragoneses, englobados na iniciativa 'Lei de linguas, si', abriu unha recollida de sinaturas por internet para "instar as autoridades aragonesas" a dar cumprimento ao mandato estatutario que as obriga a promulgar unha lei de linguas de Aragón na que se ten que definir o status legal do catalán e o aragonés.
Fonte: Avui
Boletín
Subscríbase ao boletín
