Aragón
A Academia Aragonesa queda sen financiamento do Goberno español
Mentres que reciben financiamento as academias das diferentes linguas minorizadas do Estado, catalán, éuscaro e galego, e mesmo o asturiano que non ten o status de oficialidade, óbviase destinar unha partida ao aragonés, declarado pola Unesco como lingua en perigo de extinción.
Fonte: Ara Info
A Universidade de Zaragoza presenta unha investigación sobre o uso da lingua aragonesa
Para a realización desta investigación tomáronse como base máis 1000 enquisas realizadas en 2023 en 60 municipios da provincia de Huesca e do norte da de Zaragoza. Trátase do primeiro estudo de carácter sociolóxico centrado no uso do aragonés.
Fonte: Ronda Somontano
Entréganse os VII premios Agora x l’aragonés que recoñecen os mellores traballos audiovisuais en lingua aragonesa
Estes galardóns recoñecen os mellores traballos gravados, subtitulados ou dobrados ao aragonés. Na categoría xeral o premio foi para Luz de setiembre e na escolar, para Pende de ros 2/Depende de los 2.
Fonte: El Cruzado
O municipio de Mequinenza acolle unha concentración en defensa do aragonés e o catalán de Aragón
O concello zaragozano de Mequinenza reuniu máis de 300 persoas das tres provincias nun acto para defender o uso do aragonés e o catalán de Aragón como linguas propias.
Fonte: El Nacional
A Deputación de Zaragoza reivindica a riqueza lingüística de Aragón cun programa de actividades
Este amplo programa está composto por máis de 25 actividades entre as que figuran charlas, presentacións, proxeccións... que se desenvolverán en diversas localidades da provincia de Zaragoza.
Fonte: Hoy Aragón
Só un 2 % da poboación de Aragón fala aragonés
O uso do aragonés diminuíu na comunidade e só o 2 % fala esta lingua, o que equivale a 25 000 falantes. Mentres, na zona fronteiriza con Cataluña, un 4 % utiliza o catalán a diario.
Fonte: Hoy Aragón
Unha mostra percorre as áreas lingüísticas de Aragón
A exposición “Áreas lingüística de Aragón y del aragonés”, inaugurada co gallo do inicio do Diploma de Filoloxía Aragonesa, mostra 58 mapas lingüísticos na Facultade de Educación.
Fonte: Diario del Alto Aragón
A comarca da Jacetania promoverá o aragonés no territorio
A comarca da Jacetania asinou coa Asociación Espelungué un convenio de colaboración para promover o aragonés no territorio, polo que asignará 1500 euros para impartir cursos desta lingua e realizar publicacións, xogos tradicionais ou actividades culturais.
Fonte: Heraldo
Increméntase o número de estudantes matriculados na materia de aragonés
Arredor de 1300 estudantes reciben neste curso 2023-24 clases de aragonés en 30 centros de primaria e secundaria de 50 localidades de Aragón, o que supón un incremento con respecto a anos anteriores.
Fonte: Aragón Noticias
A Academia Aragonesa da Lingua e a institución do Xustiza de Aragón asinan un convenio para o uso, a protección e a promoción das linguas aragonesas
Ambas as institucións asinaron un convenio marco de colaboración que ten como obxectivo fomentar o uso, a protección e a promoción das linguas e as modalidades lingüísticas propias de Aragón.
Fonte: La Litera Información
Boletín
Subscríbase ao boletín
