Aragón
A Comarca do Alto Gállego edita un vídeo para fomentar o uso do aragonés
Baixo o título Alzemos l'aragonés, o vídeo editado pola área de Política Lingüística da Comarca do Alto Gállego amosa o estado do aragonés na zona e o seu nivel de uso, así como a importancia de conservar esta lingua.
Fonte: Heraldo
A Comunidade de Traballo dos Pireneos introduce progresivamente o aragonés no seo da organización
Coa colaboración do Goberno de Aragón, a Comunidade de Traballo dos Pireneos traducirá a súa web ao aragonés, unha lingua que irá introducindo de xeito progresivo no funcionamento da organización.
Fonte: AraInfo
Publícase a quinta versión do dicionario en liña “Aragonario”
A Dirección Xeral de Política Lingüística e Turismo do Goberno de Aragón presenta a actual proposta do dicionario, que conta cun novo deseño da interface, a reprodución vocal de cada termo e a incorporación de 1291 entradas máis na dirección aragonés-castelán.
Fonte: Heraldo
Editan un mapa toponímico de Nonaspe para conservar o seu patrimonio lingüístico
Esta iniciativa da Dirección Xeral de Política Lingüística do Goberno de Aragón e da Associació Amics de Nonasp, en colaboración co Concello de Nonaspe, ten o obxectivo de protexer e transmitir o patrimonio lingüístico e cultural da zona e difundir os nomes cos que se coñecían os diferentes lugares tradicionalmente.
Fonte: Heraldo
Nomean os primeiros membros da Academia Aragonesa da Lingua
O nomeamento dos primeiros quince membros da Academia Aragonesa da Lingua ten como obxectivo establecer as normas do uso correcto das linguas e modalidades lingüísticas propias de Aragón, impulsar a súa promoción social e asesorar os poderes públicos e as institucións neste ámbito.
Fonte: Ronda Huesca
O Goberno de Aragón convoca dous programas para a difusión do aragonés e do catalán
Os programas “Luzía Dueso” e “Jesús Moncada” van dirixidos aos centros docentes non universitarios da comunidade autónoma durante o curso 2021-2022. O seu obxectivo é ofrecer actividades adaptadas a todas as áreas curriculares para difundir o aragonés e as súas variedades lingüísticas e o catalán que se fala en Aragón.
Fonte: El Periódico de Aragón
Celébrase a semana das linguas de Aragón con actividades dedicadas á literatura, historia e ás interaccións entre o aragonés, o catalán e o castelán
Durante as actividades programadas pola Universidade de Zaragoza no seu campus de verán de Xaca entre o 14 e o 16 de xullo, varios especialistas revisarán a historia e a realidade actual da literatura aragonesa escrita en aragonés e catalán. Tamén se analizarán as interaccións entre estas dúas linguas e o castelán en distintos territorios.
Fonte: AraInfo
O Goberno de Aragón destina 5000 euros a desenvolver actividades a prol das linguas propias
O Goberno de Aragón subscribe un acordo de colaboración coa comarca de La Ribagorza para poñer en marcha medidas a prol do aragonés e o catalán de Aragón, e as súas variedades dialectais tales como actividades de difusión, dinamización social e cultural, publicacións, rótulos etc.
Fonte: El Periódico de Aragón
Sae á luz o primeiro disco de rap en aragonés
Os Chardins de Shalimar é o nome do primeiro disco publicado en aragonés. Para Krevi Solenco, o seu autor, trátase dun medio de expresión para reivindicar esta lingua e para falar de cuestións sociais.
Fonte: elDiario.es
A Facultade de Ciencias Humanas e da Educación do campus de Huesca realiza unha exposición coas linguas de Aragón como protagonistas
Para celebrar o Día de Aragón, a facultade recupera a exposición ‘Aragón 3L’ sobre a realidade lingüística da Comunidade e ofrece unha visión xeral sobre a situación do castelán, do aragonés e do catalán. Será posible visitala desde o día 26 de abril ata o día 3 de maio, de luns a venres e de 8:30 a 21:00 horas no edificio principal do centro.
Fonte: Radio Huesca
Boletín
Subscríbase ao boletín
