Mercedes Jaime, profesora da Universidade de Zaragoza, publica un dicionario de terminoloxía veterinaria inglés-español, resultado de trinta anos de traballo e orientado tanto ao ámbito académico como profesional. A obra abrangue todas as especialidades da medicina veterinaria e está deseñada para facilitar a comprensión, redacción e tradución de textos técnicos. Publicado inicialmente en formato impreso, prevese o seu acceso en liña para ampliar o seu uso entre diversos perfís científicos e técnicos.

Fonte: Fundéu

Un grupo de veciños da Franxa puxo en marcha Lo Pregó de la Franja, un medio dixital en catalán que busca dar voz a este territorio historicamente ignorado nos medios e promover o uso da lingua catalá. A iniciativa, nacida o 23 de abril, aposta pola diversidade dialectal e procura visibilizar a realidade local máis alá da cuestión lingüística.

Fonte: Diari de la Llengua

A Unesco alerta do perigo de desaparición que sofre o aragonés, unha lingua que apenas conta con 10 000 persoas falantes habituais e cuxo uso resulta aínda máis residual en variedades coma o belestán. Esta última, falada no val de Bielsa, apenas sobrevive en vinte persoas. Para preservar esta riqueza lingüística, o pastor Ángel Luis Saludas leva case cinco décadas a elaborar a man un dicionario co vocabulario propio do belestán, un traballo que busca impedir que se perda para sempre.

Fonte: Infobae

O Festival Internacional de Documental Etnográfico de Sobrarbe, Espiello, convoca a oitava edición dos Premios Agora x l’aragonés, destinados a recoñecer as mellores obras audiovisuais en lingua aragonesa. Con dúas categorías (xeral e escolar), os galardóns buscan promover a creación, visibilizar esta lingua e difundir o seu patrimonio cultural.

Fonte: Sobrarbe Digital

A IX Trobada d'Estudios e Rechiras arredol d'a Luenga Aragonesa e a suya Literatura, organizada por varias institucións aragonesas, celébrase en Huesca do 3 ao 5 de outubro. Especialistas no aragonés presentarán trinta relatorios sobre temas históricos, literarios, lingüísticos e pedagóxicos, e tamén sobre o uso de ferramentas tecnolóxicas para linguas minoritarias. O encontro conta coa participación de investigadores de varias universidades e inclúe concertos e recitais poéticos en aragonés, coa finalidade de promover a investigación e o estudo desta lingua.

Fonte: Universidad de Zaragoza

A Comarca Alto Gállego publicou un mapa interactivo, accesible mediante un código QR, titulado "Topónimos de Serrablo", no que se recollen os nomes de fontes, camiños e montes de vinte localidades. O traballo, elaborado por Miguel López Otal, baséase en entrevistas realizadas nos anos setenta e oitenta a antigos habitantes da zona, o que permitiu rescatar así unha valiosa memoria lingüística e cultural. A iniciativa busca consolidar a lingua aragonesa conservada na toponimia local.

Fonte: Pirinews

Cinco entidades culturais de Aragón solicítanlle ao Goberno aragonés que declare o aragonés e o catalán como Ben de Interese Cultural Inmaterial, debido á súa importancia histórica e cultural no territorio dende a fundación do reino. As entidades piden tamén medidas para preservar ambas as linguas, cuxa supervivencia está ameazada pola falta de apoio institucional, segundo a Unesco e o Consello de Europa.

Fonte: La Comarca

O Goberno de Aragón está reconsiderando a súa proposta de eliminar o recoñecemento oficial do catalán e do aragonés como linguas propias e xa non xulga prioritario modificar a normativa que incluía este recoñecemento.

Fonte: Diari de la Llengua

Mentres que reciben financiamento as academias das diferentes linguas minorizadas do Estado, catalán, éuscaro e galego, e mesmo o asturiano que non ten o status de oficialidade, óbviase destinar unha partida ao aragonés, declarado pola Unesco como lingua en perigo de extinción.  

Fonte: Ara Info

Para a realización desta investigación tomáronse como base máis 1000 enquisas realizadas en 2023 en 60 municipios da provincia de Huesca e do norte da de Zaragoza. Trátase do primeiro estudo de carácter sociolóxico centrado no uso do aragonés.

Fonte: Ronda Somontano