Iniciativa polo Asturiano amosou o seu rexeitamento ao trato que se lle dá ao idioma asturiano na celebración do Día de Asturias e que, en opinión deste colectivo, non deixa de ser discriminatorio. Segundo asegura nun comunicado, no cartel do Día de Asturias, que se celebra este ano en Candás, o asturiano está presente a tamaño moito menor que o texto en castelán e cunha cor que dificulta a súa lexibilidade.

Fonte: ABC

Os Bolechas, a serie infantil en galego máis exitosa da televisión, dará o salto a Asturias. A Televisión do Principado de Asturias emitirá este programa en lingua asturiana. Vacaloria Producións está a traballar na dobraxe do programa e a dirección do ente público de comunicación de Asturias anunciará en datas próximas a súa emisión.

Fonte: Galicia Confidencial

O Consello Escolar do Estado –no que está representada toda a comunidade educativa (profesores, pais e nais do alumnado)- aprobou a creación da especialidade docente de Lingua Asturiana, unha histórica reivindicación na comunidade autónoma, especialmente do movemento asturianista.

Fonte: El Comercio

O Concello de Castrillón acaba de pór en funcionamento o Servizo de Normalización Lingüística, un servizo público a disposición de toda a cidadanía que ten por obxecto promover e facilitar o uso do asturiano na institución municipal e entre os veciños do municipio.

Fonte: Asturnews

A Xunta pola Defensa da Lingua Asturiana acaba de anunciar que enviará á RTPA e á Oficina de Política Lingüística do Principado un decálogo que axude a unificar criterios a todas as partes implicadas no proceso de dobraxe, ademais de aos grupos políticos. Despois da emisión de dúas longametraxes e dunha serie infantil dobrada ao asturiano na Televisión do Principado de Asturias, a Xunta pola Defensa da Lingua Asturiana quere iniciar o proceso a través da publicación do documento Decálogo sobre a dobraxe asturiana.

Fonte: Asturnews

Ou Lingua ou Cultura Asturiana. Son as opcións que o Principado deu a escoller como materias de libre configuración autonómica aos nenos de primeiro, terceiro e quinto de Primaria no estreo da LOMCE. A principios de curso, os pais do ensino público e concertado xa afirmaron que non eran partidarios desta división e agora, despois dun mes do inicio das clases, púidose comprobar que polo menos nos colexios concertados de Xixón só unha minoría escolleu a lingua.

Fonte: El Comercio

O concurso premia as mellores obras escritas en asturiano que cumpran os requisitos de ter un mínimo de cinco follas ata un máximo de 20. Ademais, todas as obras deben ser orixinais e anónimas.

Fonte: La Nueva España

Damián Barreiro Maceiras, xornalista da Estrada, de nai asturiana e pai galego, acaba de gañar o Premio Máximo Fuertes Acevedo de ensaio pola súa obra Caleya Sésamu: el papel de la televisión na tresmisión interxeneracional da llingua, que presentou baixo o pseudónimo Son Goku.

Fonte: Galicia Confidencial

A Xunta Xeral aprobou en sesión plenaria unha moción de Esquerda Unida que lle pide ao Principado que negocie co Goberno central “con todos os medios ao seu alcance” para que se inclúan nos decretos de primaria e secundaria a especialidade do asturiano “para normalizar e equipar os profesores de asturiano co resto do profesorado”.

Fonte: 20 minutos

A Consellería de Cultura acaba de anunciar a convocatoria dunha nova liña de subvencións para incrementar a dotación de libros en asturiano nas bibliotecas públicas. Os concellos titulares de centros de lectura integrados na Rede de Bibliotecas do Principado de Asturias deben solicitar axuda económica con esta finalidade.

Fonte: Asturnews