Cataluña
Vic impulsa unha campaña para fomentar o uso do catalán en todos os contextos
O Concello de Vic puxo en marcha unha campaña nas redes sociais para promover o uso do catalán en todos os espazos da vida diaria e subliñar o seu valor como símbolo de cohesión e identidade. A iniciativa forma parte do Plan de acción municipal pola lingua que inclúe medidas como a creación dun espazo de denuncias lingüísticas, cláusulas nos contratos públicos e formación para o persoal.
Fonte: El Món
O Goberno de Cataluña organiza un concurso de proxectos de aplicacións innovadoras en catalán para start-ups e pemes
A Generalitat de Cataluña lanzou o Aina Challenge, un concurso dirixido a pequenas empresas e start-ups que desenvolvan proxectos innovadores en intelixencia artificial e tecnoloxías da linguaxe en catalán. A iniciativa, impulsada polo Barcelona Supercomputing Center no marco do Proxecto Aina, conta cun orzamento de 1 millón de euros para financiar ata 22 propostas que respondan a tres retos clave: creación de aplicacións, control dos sistemas e xeración de recursos abertos. O obxectivo é fortalecer a presenza do catalán no ecosistema dixital e favorecer a súa integración en ferramentas baseadas en IA.
Fonte: Diari de la Llengua
Varios concellos de Cataluña acollerán obradoiros de maxia para fomentar o uso do catalán
Os obradoiros de maxia desenvolveranse en catorce municipios de Cataluña e están dirixidos ás parellas lingüísticas do programa Voluntariado pola Lingua. A actividade, dinamizada polo mago Eduard Juanola, permite practicar o catalán nun contexto lúdico coa implicación das persoas voluntarias.
Fonte: Generalitat de Catalunya
Amplíase a oferta de curso de catalán en 30 000 prazas
O Goberno catalán aprobou un plan de choque para ampliar en 30 000 as prazas de formación en lingua catalá, co obxectivo de alcanzar as 140 000 anuais en 2026. A iniciativa, cun investimento de 8,8 millóns de euros, está dirixida a persoas recentemente chegadas e a sectores como a educación, a saúde e o comercio. Inclúe máis cursos, novos formatos, maior frecuencia e unha aposta pola descentralización a través de subvencións aos municipios.
Fonte: El Nacional
Preséntanse os resultados do Estudo e o Plan Ofercat para fomentar o uso do catalán no comercio de Vic
O Estudo Ofercat, que analiza o uso do catalán no comercio de Vic, serve de base para un novo Plan que busca reforzar a presenza da lingua no sector. A investigación revela que un 75,7 % do persoal comercial inicia as interaccións en catalán e que os rótulos identificativos nesta lingua alcanzan o 60,9 %. O Concello e o Centro de Normalización Lingüística impulsarán formacións e accións de sensibilización, como o programa Comerços aprenents, para mellorar a competencia lingüística no sector.
Fonte: Generalitat de Catalunya
O Tribunal Superior de Xustiza de Cataluña desestima os recursos do Goberno catalán contra o 25 % de castelán nas aulas
O Tribunal Superior de Xustiza de Cataluña rexeitou os recursos da Generalitat e ratificou a obrigatoriedade de impartir o 25 % das clases en castelán nos centros educativos. A Generalitat argumentaba que o Decreto Lei 6/2022 impide establecer porcentaxes lingüísticas, pero o tribunal considerou que os recursos non xustificaban suficientemente o interese casacional da súa petición.
Fonte: 20minutos
O Parlamento de Cataluña propón que o catalán se converta en lingua de acollida para as persoas acabadas de chegar á comunidade
O Parlamento de Cataluña aprobou unha moción que propón o catalán como lingua de acollida para as persoas recentemente chegadas a Cataluña de cara a facilitar a súa integración e a igualdade de oportunidades. Ademais, reclama ao Estado un compromiso firme coa normalización do catalán nos territorios de fala catalá e insta o Goberno de Cataluña a garantir a reciprocidade televisiva entre TV3, IB3 e À Punt.
Fonte: Infobae
A Generalitat de Cataluña convoca axudas para fomentar o coñecemento e o uso do aranés
O Departamento de Política Lingüística abriu o prazo para solicitar axudas destinadas á promoción do coñecemento e uso do aranés. As subvencións, que poden cubrir ata o 80% do custo dos proxectos, están dirixidas a persoas físicas, entidades sen ánimo de lucro e empresas, sempre que a iniciativa teña unha vinculación directa co aranés ou co Arán.
Fonte: Generalitat de Catalunya
A Rede Vives impulsa unha declaración para garantir protección do catalán e o reforzo da súa presenza na esfera pública e académica
A Declaración de Montserrat, promovida pola Rede Vives de Universidades, reafirma o seu compromiso cunha educación superior innovadora, sustentable e inclusiva. Defende unha política multilingüe que combine a vocación internacional coa promoción do catalán e aposta por fortalecer alianzas estratéxicas e proxectos interuniversitarios para incrementar o impacto social e cultural das universidades.
Un terzo das materias dos mestrados das universidades públicas de Cataluña impártese en catalán
A oferta de materias en catalán nos mestrados das universidades públicas de Cataluña reduciuse a un terzo, mentres que aumentou en castelán e inglés. Nos graos, a presenza desta lingua segue sendo maioritaria, pero tamén diminuíu lixeiramente nos últimos seis anos. A Universidade de Xirona é a que máis utiliza o catalán (84 %), mentres que a UPF é a que menos (45 %), debido á súa vocación internacional.
Fonte: El Nacional
Boletín
Subscríbase ao boletín
