Cataluña
Nace un novo recurso para aprender catalán de maneira oral fóra da aula
A Dirección Xeral de Política Lingüística crea Ep! Interactiu, que ofrece actividades baseadas en imaxes e sons para aprender estruturas sinxelas e vocabulario básico a todas as persoas que queiran aprender a dominar o catalán oralmente ou consolidar o que aprenderon na aula. Este recurso tamén vai dirixido a profesorado para adultos, a través dunha ferramenta con actividades en liña para as súas aulas virtuais.
Fonte: Generalitat de Catalunya
O alumnado de Cataluña poderá escoller a lingua dos exames de selectividade
O Tribunal Superior de Xustiza de Cataluña ordena que o alumnado poida elixir a lingua na que prefire realizar os exames de selectividade. Poderá escoller entre o catalán, o castelán ou o aranés.
Fonte: El País
Disney + ofrece máis contido en catalán
Co apoio da Dirección Xeral de Política Lingüística, a plataforma audiovisual incorpora novas películas dobradas en catalán, que sumarán un total de 14 coa estrea de “Jungle Cruise". A Generalitat comunicou que Disney + irá ofrecendo cada vez máis títulos nesta lingua.
Fonte: La Vanguardia
Publícase “Nou itineraris: Ruta de les Homilies d’Organyà” sobre os lugares emblemáticos da lingua catalá
A Dirección Xeral de Política Lingüística publica en liña os itinerarios emblemáticos para a configuración do catalán e os lugares onde se fala esta lingua. A información vai dirixida a todas as persoas que queiran coñecer mellor o idioma no seu contexto territorial ou as que se atopen estudándoo e ás entidades que promoven o seu uso.
Fonte: Generalitat de Catalunya
Dous novos anuncios e unha cuña radiofónica promoven o aranés en Cataluña
A Dirección Xeral de Política Lingüística busca fomentar o uso e o coñecemento do aranés a través da publicidade institucional. Os anuncios e a cuña radiofónica estarán presentes en todos os canais da Corporación Catalá de Medios Audiovisuais, de televisión e de radio.
Fonte: Generalitat de Catalunya
A Generalitat e Movistar+ renovan o seu acordo para ofrecer películas e series en catalán
O pacto entre o Departamento de Cultura da Generalitat e a plataforma dixital Movistar+ fixo que se subtitulasen case 18000 películas e 2171 episodios en catalán ata 2020 e que se ofrezan películas con audio nesta lingua. A previsión para 2021 é que se subtitulen 280 películas e 300 capítulos de series.
Fonte: Segre
O Instituto de Estudos do Autogoberno organiza un seminario en liña para impulsar o catalán na mocidade, no ámbito da migración e no do audiovisual
O seminario chámase “Linguas e Autogoberno” e busca establecer unhas medidas e prácticas para protexer a dinamización do catalán entre a xuventude, a migración e o audiovisual, xa que son tres vectores do futuro desta lingua.
Fonte: Generalitat de Catalunya
Un estudo sobre os usos lingüísticos na asistencia sanitaria en Cataluña mostra que o catalán é máis frecuente no persoal sanitario de máis idade
O estudo, levado a cabo pola Sociedade Catalá do Dicionario Enciclopédico de Medicina e a Fundación Dr. Antoni Esteve, coa colaboración do Departamento de Cultura e do Departamento de Saúde, afirma que o 65 % do persoal médico e de enfermería utiliza o catalán de maneira habitual cos pacientes e que os profesionais máis novos utilizan máis o castelán no día a día e nos documentos médicos.
Fonte: Generalitat de Catalunya
A Generalitat publica un manual para promover a aprendizaxe do aranés
A publicación do manual Aprenem aranès des del català ofrece un primeiro contacto de nivel básico co aranés para coñecer, escoitar e comezar a practicar esta lingua.
Fonte: Generalitat de Catalunya
A presenza do catalán avanza en Netflix grazas ao éxito da estrea da película “La família Mitchell contra les màquines”
A Plataforma pola Lingua espera que a estrea da versión catalá do filme La família Mitchell contra les màquines no catálogo de Netflix sirva de exemplo para ampliar a oferta de obras audiovisuais en catalán.
Fonte: La Vanguardia
Boletín
Subscríbase ao boletín
