Cada ano prodúcense arredor dun milleiro de vídeos musicais en catalán. Para darlles visibilidade nace na canle 33 o programa Clipping, que ofrecerá cada sábado unha selección de videoclips que mostren a actualidade musical e audiovisual de Cataluña.

Fonte: El Periódico

Segundo a Plataforma per la Llengua, o emprego do catalán nas horas lectivas dos estudos de Dereito nas universidades non chega nin ao 50 %, tanto nos estudos de grao como de mestrado, unha situación que repercute no sistema xudicial.

Fonte: Plataforma per la Llengua

No curso 2018-19, as materias en catalán nas universidades públicas de Cataluña alcanzaron as 19 128, o que significa un incremento do 18,6 % con respecto ao curso 2014-15, cando foron 16 122.

Fonte: La Vanguardia

A proba piloto do proxecto de parellas lingüísticas en lingua de signos catalá busca que as persoas participantes melloren e practiquen esta lingua e coñezan a comunidade e a cultura xordas. Formaranse cinco parellas que terán encontros semanais para signar que se estenderán ata finais do mes de decembro.

Fonte: Generalitat de Catalunya

A Dirección Xeral de Política Lingüística presentou, nun acto en liña que se retransmitiu por YouTube, cinco novos libros de lectura fácil, catro en catalán e, por primeira vez, un en aranés.

Fonte: Generalitat de Catalunya

Os cursos de catalán para persoal sanitario residente teñen vinte horas de duración e buscan ofrecerlles ás persoas asistentes unha primeira aproximación a esta lingua, que lles permita adquirir habilidades de comprensión e de produción oral básicas para empregar en situacións cotiás no ámbito da saúde.  

Fonte: Generalitat de Catalunya

O Terra Gollut Film Festival, que se celebra entre o 9 e o 31 de outubro, terá dous formatos, con sesións en liña e presenciais. Por primeira vez no certame, exhibiranse filmes en versión orixinal subtitulados en catalán, un total de oito, grazas á colaboración da Dirección Xeral de Política Lingüística.  

Fonte: Generalitat de Catalunya

Ata o 5 de novembro a poboación de Granollers poderá participar nun concurso que pretende fomentar, ao mesmo tempo, o comercio de barrio e o uso do catalán, así como dar a coñecer vocabulario específico de diferentes tipos de tendas.

Fonte: Revista Digital del Vallès

O Voluntariado pola Lingua, un programa que busca mellorar o dominio do uso oral do catalán, inicia unha nova tempada de actividades no marco dunha campaña que ten como lema “Quan parles fas màgia” e cuxo obxectivo é incidir na transformación persoal que supón para aprendices e voluntarios practicar xuntos este idioma.

Fonte: Generalitat de Catalunya

Segundo unha enquisa realizada pola Oficina Pública da Lingua Occitana, o Val de Arán é a zona do seu dominio lingüístico na que presenta mellor situación, xa que é onde máis se coñece e máis se fala.

Fonte: Generalitat de Catalunya