Mediante o convenio asinado entre a Generalitat e o Consello dos Ilustres Colexios de Avogados de Cataluña (CICAC) preténdese fomentar o uso do catalán na xustiza gratuíta e garantir os dereitos lingüísticos da cidadanía que precise atención nun proceso xudicial.

Fonte: Generalitat de Catalunya

Desde o 25 de decembro, coincidindo coa estrea do filme Soul, o catalán está dispoñible nas opcións de idioma de Disney+, no marco da colaboración entre esta plataforma e a Generalitat de Cataluña para impulsar a oferta e o consumo de contidos audiovisuais nesta lingua.

Fonte: Vertele!

O Pleno do Parlamento de Cataluña rexeitou unha moción en contra do sistema educativo de inmersión lingüística, unha votación que se produce despois da sentenza do Tribunal Superior de Xustiza de Cataluña (TSJC) que obriga a garantir que todo o alumnado reciba un mínimo do 25 % de clases en castelán como lingua vehicular.

Fonte: El Diario

Co lema “A la xarxa, peta-ho en català” e o cancelo para a súa difusión #JoHoPetoEnCat, nace unha campaña de sensibilización para promover o uso do catalán entre a xente nova que crea contidos nas redes sociais como YouTube, Instagram, TikTok....

Fonte: Generalitat de Catalunya

Dende o ano 2017 a Generalitat de Cataluña vén organizando accións de sensibilización sobre o uso do catalán en 406 marcas líder de 38 sectores empresariais diferentes, ás que lles solicita que empreguen esta lingua nas súas redes sociais, xa que se trata de canles de comunicación de especial relevancia nos últimos tempos.

Fonte: Generalitat de Catalunya

Co lema ‘Català i empresa’ o Departamento de Cultura iniciou unha campaña de sensibilización dirixida a grandes marcas, emprendedores e establecementos comerciais que se difundirá a través das redes sociais co cancelo #CatalàiEmpresa.

Fonte: Generalitat de Catalunya

Apenas a metade dos videoxogos creados por estudios de Cataluña están dispoñibles en catalán e do total de videoxogos existentes, só un 5,5 % está nesta lingua. Isto a pesar de que a Generalitat impulsa o seu uso, con subvencións e outras iniciativas, e das accións do activismo lingüístico.

Fonte: El Periódico

O Goberno de Cataluña acaba de poñer en marcha o proxecto Aina para crear un corpus lingüístico e modelos informáticos que permitan que o catalán se converta nunha lingua competitiva no mundo dixital. Búscase así que as empresas que desenvolven aplicacións baseadas na intelixencia artificial poidan empregalo ao mesmo nivel que outros idiomas como o inglés ou o castelán.

Fonte: La  Vanguardia

A sétima edición da elección do neoloxismo catalán do ano ten xa dez palabras candidatas, todas relacionadas coa situación derivada da covid-19: conspiranoic, coronavirus, desconfinament, desescalada, grup bombolla, infodèmia, mascareta, teletreballar, traçabilitat e videotrucada. A gañadora optará a formar parte do dicionario normativo do Instituto de Estudos Cataláns.

Fonte: La Vanguardia

Os resultados do estudo Ofercat en Rubí mostran que só un 37 % de comerciantes se dirixe de entrada ao público en catalán, mentres que un 57 % afirma que o fala cando o cliente se dirixe ao comercio nesta lingua.  

Fonte: El Periódico