Cataluña
A Generalitat de Cataluña impulsa a dobraxe e os subtítulos en catalán
O Departamento de Cultura destinará unha dotación orzamentaria dun millón de euros á convocatoria de axudas para promover a dobraxe e os subtítulos en catalán de series e películas en plataformas de vídeo, Blu-ray e DVD, dirixidas a empresas distribuidoras e a estudios de dobraxe.
Fonte: La Vanguardia
Ponse en marcha unha campaña para reivindicar a oficialidade do catalán na Unión Europea
Plataforma per la Llengua puxo en marcha unha campaña para reivindicar a oficialidade do catalán na Unión Europea. Para facer visible esta reivindicación, a organización pide a redacción de mensaxes en Twitter con contido relacionado coa defensa dos dereitos lingüísticos cos cancelos #NoOfficialNoExist e #DiadEuropa".
Fonte: E-Notícies
As entidades vinculadas ao fomento da lingua catalá ven na crise da COVID-19 unha oportunidade para o tránsito ao formato dixital
A conselleira de Cultura da Generalitat mantivo unha reunión telemática con representantes das entidades relacionadas co fomento da lingua catalá na que estas expresaron a súa visión sobre a situación que están a vivir pola crise provocada pola COVID-19.
Fonte: Generalitat de Catalunya
O Goberno de Cataluña comprométese a mellorar a incorporación da lingua de signos catalá nas comunicacións coa Administración
A conselleira de Cultura mantivo unha reunión telemática con representantes da Federación de Persoas Xordas de Cataluña na que se comprometeu a ampliar a atención en lingua de signos catalá nas xestións coa Generalitat a través das novas tecnoloxías.
Fonte: La Vanguardia
Aula Mestra, espazo virtual para o ensino e a aprendizaxe de catalán, incrementa o seu número de usuarios na etapa de confinamento
O espazo virtual de aprendizaxe e ensino da lingua catalá Aula Mestra, destinado a docentes e estudantes de todo o mundo, aumentou notablemente a súa actividade no período de confinamento, con 113 novos cursos, que alcanzan así a cifra de 229, e 1000 usuarios máis que se suman aos 30 000 que xa tiña.
Fonte: Generalitat de Catalunya
Amplíase a consulta en liña de obras do Centro de Documentación da Dirección Xeral de Política Lingüística da Generalitat de Cataluña
O Departamento de Cultura adaptou a web do Centro de Documentación para facilitar a consulta en liña de obras de carácter sociolingüístico, así como outros recursos como artigos, revistas sobre lingua, noticias lingüísticas etc.
Fonte: Generalitat de Catalunya
Comezan as emisións de Teve.cat, unha nova canle de televisión en catalán
O pasado luns 27 abril comezaron as emisións de Teve.cat, unha nova canle de televisión que mestura entretemento, debate e actualidade e que emitirá en lingua catalá.
Fonte: InfoPeriodistas
A Generalitat de Cataluña convoca unha liña de axudas para promover o uso do catalán no ámbito tecnolóxico
A Dirección Xeral de Política Lingüística quere impulsar o uso do catalán nas novas tecnoloxías, en especial, as relacionadas co entretemento dixital da xente nova. Por este motivo, convoca unha liña de axudas dirixidas ás empresas que incorporen esta lingua nos seus produtos tecnolóxicos, sobre todo, videoxogos e aplicacións.
Fonte: Generalitat de Catalunya
O diario Ara convoca un premio de cómic en catalán
A convocatoria do Premio ARA de Cómic en Catalán ten como obxectivo fomentar o uso desta lingua nos xéneros de non ficción no cómic adulto. As persoas participantes deben presentar obras orixinais e inéditas cun mínimo de oito páxinas e un máximo de 14.
Fonte: La Vanguardia
Publícase a terminoloxía básica do coronavirus en lingua de signos catalá
A Dirección Xeral de Política Lingüística publicou a Terminoloxía básica da COVID-19 en lingua de signos catalá. O obxectivo desta publicación é dar a coñecer os principais termos e expresións relacionados con esta epidemia.
Fonte: Generalitat de Catalunya
Boletín
Subscríbase ao boletín
