Comunidade Valenciana
O Concello de Alcoi lanza unha campaña para animar o alumnado a ler en valenciano
O Concello de Alcoi promove a lectura en valenciano entre a infancia e a mocidade cunha serie de recomendacións literarias elaborado polo Gabinete Municipal de Normalización Lingüística. A proposta, dirixida ao alumnado dos centros educativos da cidade, organiza as obras por etapas e incorpora tanto títulos xuvenís internacionais como creacións de autoría local.
Fonte: Ajuntament d'Alcoi
Novelda presenta unha nova edición do Festival Llengües Sonores, unha iniciativa de promoción da música en valenciano
O Festival Llengües Sonores regresará o sábado 4 de xullo cunha noite de música en directo en valenciano. O evento contará coa participación de Romàntic Dimoni, Esther e Naina, en representación de diferentes estilos da escena musical valenciana. A iniciativa busca fomentar o uso do valenciano mediante a música, destacando a creatividade e a diversidade da produción artística nesta lingua. Ademais, promóvese como un espazo de encontro e cohesión social, que consolida o valenciano como vehículo de expresión cultural.
Fonte: Ayuntamiento de Novelda
O Consell realizará unha nova enquisa sobre o uso e o coñecemento do valenciano
O Consell encargoulle á firma valenciana Invest Group a realización dunha nova enquisa sobre o uso e o coñecemento do valenciano, cun investimento de 172.248 euros, co obxectivo de recoller datos do presente exercicio. O estudo, incluído no Plan Valenciano de Estatística 2025-2028, implicará 8043 entrevistas a domicilio con persoas maiores de 15 anos, seguindo un cuestionario definido pola Subdirección Xeral de Política Lingüística. O proxecto busca ofrecer unha fotografía completa do estado da lingua no territorio, con informes xerais e específicos para análise detallada.
Fonte: Valencia Plaza
Preséntase o Nomenclátor Toponímico Valenciano
A Academia Valenciana da Lingua presentou o Nomenclátor Toponímico Valenciano, unha ferramenta que recolle e sistematiza máis de 125.000 nomes de lugares, co que duplican os recollidos no anterior corpus de 2009, ademais de incorporar xeorreferenciación. O proxecto, elaborado pola Sección de Onomástica, ofrece unha análise lingüística e etimolóxica que permite a profesionais, persoal investigador e persoas afeccionadas acceder a topónimos normalizados, oficiais e de uso obrigatorio en cartografía e documentos públicos. A aplicación, dispoñible en liña, facilita consultas simples e avanzadas, e integra nomes alternativos e enlaces a outras plataformas lingüísticas. Ademais, permite a proposta de corrección ou inclusión de novos topónimos, asegurando unha xestión participativa e rigorosa do patrimonio toponímico valenciano.
Fonte: Diari de la Llengua
Familias valencianas denuncian a imposibilidade de matricular os seus fillos en valenciano
Centos de familias ven que se lles nega a posibilidade de matricular os seus fillos en valenciano, debido a que a Consellería de Educación asigna as aulas segundo a elección do curso anterior e non ten en conta as preferencias actuais. A asociación Famílies pel Valencià insta as familias e direccións a presentar reclamacións e pídelle á Consellería rectificación inmediata para garantir igualdade de elección.
Fonte: Diari de la Llengua
Seleccionado o Gabinete de Promoción do Valenciano de Sagunt como exemplo de boas prácticas en normalización lingüística
A Xarxa ImpliCat escolleu o Gabinete de Promoción do Valenciano do Concello de Sagunt como exemplo de boas prácticas en normalización lingüística municipal. O seu persoal técnico participará o 8 de maio na primeira Trobada ImpliCat para expoñer campañas orientadas a vincular a lingua coa identidade local e a crear novas persoas falantes. O recoñecemento salienta o traballo continuado do concello para facer do valenciano unha lingua viva, útil e presente na vida pública.
Fonte: Ajuntament de Sagunt
A Universidade Politécnica de Valencia organiza cursos en liña para a preparación de probas de valenciano
A Universidade Politécnica de Valencia ofrece cursos MOOC gratuítos para preparar as probas de valenciano dos niveis B2, C1 e C2, abertos tanto á comunidade universitaria como ao público xeral. A formación inclúe módulos lingüísticos, exercicios autocorrixibles e unha proba final para facilitar a preparación autónoma das persoas participantes.
Unha campaña anima as familias de Ontinyent a escoller o valenciano na escola
O Concello de Ontinyent puxo en marcha a campaña «Quan et matricules tria valencià», unha iniciativa coa que pretende reforzar o apoio á lingua propia no proceso de escolarización. A acción procura animar as familias a optar polo valenciano como lingua base e, asemade, informalas sobre o funcionamento deste sistema nos centros educativos.
Fonte: Diari de la Llengua
O Concello de Sangunto convoca axudas para a normalización do valenciano
O Concello de Sagunto abriu a convocatoria anual de axudas para impulsar a normalización do valenciano, destinada a empresas e asociacións que promovan esta lingua. As entidades poderán presentar ata dous proxectos antes do 6 de maio, cun orzamento mínimo de 300 euros. As propostas deberán desenvolverse integramente en valenciano e poderán abranguer desde rotulación, publicidade e materiais impresos ata accións formativas, informativas ou de sensibilización.
Fonte: Ajuntament de Sagunt
A Generalitat Valenciana elaborará unha enquisa coñecer a situación actual do uso do valenciano
A Generalitat Valenciana licitou un contrato de 245.000 euros para realizar unha enquisa sobre o coñecemento e uso do valenciano e doutras linguas, con máis de 8000 entrevistas en toda a comunidade. O estudo, incluído no Plan Valenciano de Estatística, permitirá obter datos actualizados sobre a situación sociolingüística e elaborar informes específicos para o conxunto do territorio e para a cidade de Valencia.
Fonte: Valencia Plaza
Boletín
Subscríbase ao boletín
