Comunidade Valenciana
O Goberno da Comunidade Valencia elimina nas comunicacións dos centros educativos a preferencia do valenciano
O novo Plan de Uso das Linguas aprobado polo Goberno valenciano permítelles ás familias elixir a lingua das comunicacións escolares, o que reduce a presenza do valenciano e contradí a lexislación vixente que obriga a promovelo activamente. Por este motivo reclámaselle á Consellería de Educación que cumpra co seu deber de garantir o dominio equilibrado das dúas linguas oficiais.
Fonte: Diari de la Llengua
O Concello de l’Eliana lanza una nova edición do seu certame para promover o uso do valenciano no ámbito do comercio
O Concello de l’Eliana convoca a cuarta edición dos Premios ao Uso do Valenciano no Comercio Local, co obxectivo de reforzar a presenza da lingua na vida cotiá. A iniciativa recoñece o uso do valenciano en rótulos, materiais impresos e plataformas dixitais, cunha dotación total de 3000 euros en premios.
Fonte: Ajuntament de l'Eliana
A Generalitat Valenciana destina ao Concello de Vila-real 27 000 euros en axudas para actividades de fomento do valenciano
O Concello de Vila-real recibirá máis de 27 000 euros polo seu labor a prol da normalización do valenciano, con iniciativas en ámbitos educativos, culturais e sociais. A achega sitúa a cidade como a segunda con maior subvención autonómica, só por detrás de Valencia.
Fonte: Castellón Plaza
O Concello de Valencia aproba unha denominación bilingüe e non normativa da cidade
O pleno do Concello de Valencia acordou a nova denominación da cidade, que pasará a ter un nome bilingüe "Valencia/València". Esta medida está a xerar controversia, xa que a nova denominación se afasta da forma normativa en valenciano.
Fonte: Diari de la Llengua
A música en valenciano conquista o público do Feslloc
O festival Feslloc celebrou unha nova edición onde a música en valenciano foi protagonista, cunha asistencia masiva de público e actuacións que puxeron en valor a lingua propia e a cultura local. O evento reivindicou o papel da música como ferramenta de transformación social.
Fonte: Diari de la Llengua
O Concello de Valencia prosegue coa súa intención de mudar a denominación oficial da cidade
O Concello de Valencia anunciou que xa recibiu o informe que avala o cambio de denominación oficial da cidade. Agora pasaría a chamarse Valéncia-Valencia.
Fonte: Diari de la Llengua
O Concello de l’Eliana organiza formación destinada ao seu persoal para mellorar o uso do valenciano na xestión administrativa
O Concello de l'Eliana completou un curso de linguaxe administrativa en valenciano para mellorar a competencia lingüística do seu persoal e garantir unha comunicación máis clara e axustada á normativa. A formación combinou sesións presenciais e traballo en liña e estivo centrada na redacción de documentos oficiais ou o uso correcto da linguaxe xurídica e institucional.
Fonte: Ajuntament de l'Eliana
O Concello de Calp pon en marcha un servizo de información á cidadanía en valenciano, castelán e inglés
O Concello de Calp activou novas canles oficiais en WhatsApp e Telegram para informar a veciñanza e visitantes sobre novidades, avisos e eventos. As persoas interesadas poden subscribirse e escoller entre tres idiomas: castelán, valenciano ou inglés. Esta medida pretende facilitar o acceso á información pública e actuar con axilidade en situacións de urxencia.
Fonte: Calp Digital
Centenares de persoas protestan en Alacant pola declaración da cidade como zona castelanfalante
O Concello de Alacant aprobou unha proposta para deixar de formar parte da zona de predominio lingüístico valenciano, decisión que agora debe ratificar o Parlamento autonómico. A medida xerou forte rexeitamento social e mobilizacións cidadás, ao considerar que supón un retroceso na presenza do valenciano na escola e na vida pública.
Fonte: Diari de la Llengua
Difunden un modelo de recurso para as familias que queiran reclamar a escolarización en valenciano
Escola Valenciana elaborou un modelo de recurso administrativo para que as familias poidan reclamar o dereito a escolarizar as súas fillas e fillos en valenciano e rexeitar a asignación de grupos en castelán amparada pola chamada Lei Rovira. A entidade denuncia que esta normativa vulnera a liberdade lingüística e anuncia que, se a vía administrativa non resolve, recorrerán aos tribunais para garantir o ensino na lingua propia.
Fonte: Diari de la Llengua
Boletín
Subscríbase ao boletín
