Decorouse a sala de espera, o corredor e tres consultas de Urxencias Pediátricas do Hospital Xeral co obxectivo de humanizar os espazos e favorecer a integración lingüística e social mediante ilustracións e lemas en valenciano que fomentan hábitos saudables. O proxecto tamén pretende mellorar a experiencia das familias e do persoal sanitario, ofrecendo un contorno máis acolledor e facilitando o contacto coa lingua para quen non a fala.

Fonte: Consorci Hospital General Universitari València

O Servizo de Promoción e Normalización Lingüística lanza a campaña «Matriculem-nos en valencià, perquè tota pedra fa paret» para fomentar o uso do valenciano na docencia e na vida académica durante o curso 2025-2026. A iniciativa anima o estudantado a empregar a lingua desde o primeiro día en todas as actividades, solicitar materiais en valenciano e aproveitar actividades como formación, acreditación e voluntariado lingüístico.

Fonte: Universitat Politèctica de València

O novo Plan de Uso das Linguas aprobado polo Goberno valenciano permítelles ás familias elixir a lingua das comunicacións escolares, o que reduce a presenza do valenciano e contradí a lexislación vixente que obriga a promovelo activamente. Por este motivo reclámaselle á Consellería de Educación que cumpra co seu deber de garantir o dominio equilibrado das dúas linguas oficiais.

Fonte: Diari de la Llengua

O Concello de l’Eliana convoca a cuarta edición dos Premios ao Uso do Valenciano no Comercio Local, co obxectivo de reforzar a presenza da lingua na vida cotiá. A iniciativa recoñece o uso do valenciano en rótulos, materiais impresos e plataformas dixitais, cunha dotación total de 3000 euros en premios.

Fonte: Ajuntament de l'Eliana

O Concello de Vila-real recibirá máis de 27 000 euros polo seu labor a prol da normalización do valenciano, con iniciativas en ámbitos educativos, culturais e sociais. A achega sitúa a cidade como a segunda con maior subvención autonómica, só por detrás de Valencia.

Fonte: Castellón Plaza

O pleno do Concello de Valencia acordou a nova denominación da cidade, que pasará a ter un nome bilingüe "Valencia/València". Esta medida está a xerar controversia, xa que a nova denominación se afasta da forma normativa en valenciano.

Fonte: Diari de la Llengua

O festival Feslloc celebrou unha nova edición onde a música en valenciano foi protagonista, cunha asistencia masiva de público e actuacións que puxeron en valor a lingua propia e a cultura local. O evento reivindicou o papel da música como ferramenta de transformación social.

Fonte: Diari de la Llengua

O Concello de Valencia anunciou que xa recibiu o informe que avala o cambio de denominación oficial da cidade. Agora pasaría a chamarse Valéncia-Valencia.

Fonte: Diari de la Llengua

O Concello de l'Eliana completou un curso de linguaxe administrativa en valenciano para mellorar a competencia lingüística do seu persoal e garantir unha comunicación máis clara e axustada á normativa. A formación combinou sesións presenciais e traballo en liña e estivo centrada na redacción de documentos oficiais ou o uso correcto da linguaxe xurídica e institucional.

Fonte: Ajuntament de l'Eliana

O Concello de Calp activou novas canles oficiais en WhatsApp e Telegram para informar a veciñanza e visitantes sobre novidades, avisos e eventos. As persoas interesadas poden subscribirse e escoller entre tres idiomas: castelán, valenciano ou inglés. Esta medida pretende facilitar o acceso á información pública e actuar con axilidade en situacións de urxencia.

Fonte: Calp Digital