O Concello de Ontinyent puxo en marcha a campaña «Quan et matricules tria valencià», unha iniciativa coa que pretende reforzar o apoio á lingua propia no proceso de escolarización. A acción procura animar as familias a optar polo valenciano como lingua base e, asemade, informalas sobre o funcionamento deste sistema nos centros educativos.

Fonte: Diari de la Llengua

O Concello de Sagunto abriu a convocatoria anual de axudas para impulsar a normalización do valenciano, destinada a empresas e asociacións que promovan esta lingua. As entidades poderán presentar ata dous proxectos antes do 6 de maio, cun orzamento mínimo de 300 euros. As propostas deberán desenvolverse integramente en valenciano e poderán abranguer desde rotulación, publicidade e materiais impresos ata accións formativas, informativas ou de sensibilización.

Fonte: Ajuntament de Sagunt

A Generalitat Valenciana licitou un contrato de 245.000 euros para realizar unha enquisa sobre o coñecemento e uso do valenciano e doutras linguas, con máis de 8000 entrevistas en toda a comunidade. O estudo, incluído no Plan Valenciano de Estatística, permitirá obter datos actualizados sobre a situación sociolingüística e elaborar informes específicos para o conxunto do territorio e para a cidade de Valencia.

Fonte: Valencia Plaza

A Deputación de Valencia convocou axudas por valor de 104.000 euros para que concellos e entidades locais organicen cursos de valenciano dirixidos á cidadanía. A iniciativa, integrada no plan «La llengua del nostre poble», busca fomentar o coñecemento e o uso social da lingua no ámbito municipal e facilitar o acceso á aprendizaxe en todo o territorio.

Fonte: Valencia News

A Consellería de Educación, Cultura e Universidades da Comunidade Valenciana convocou o programa de intercambio escolar Pont de Llengües para o curso 2025-2026, co obxectivo de mellorar a competencia comunicativa en valenciano e favorecer a cohesión lingüística entre centros con realidades sociolingüísticas distintas. A iniciativa diríxese a centros públicos non universitarios que deberán presentar proxectos conxuntos con actividades educativas e unha xornada de convivencia presencial. O programa conta cun orzamento de 100.000 euros e valorará especialmente o impacto na aprendizaxe da lingua, a inclusión e a participación de centros situados en áreas de predominio castelán.

Fonte: Generalitat Valenciana

A canle de televisión pública À Punt entregou os premios da primeira edición de Apunts de Llengua, un certame que recoñece os mellores videotitoriais sobre valenciano en dúas modalidades, unha centrada na explicación da lingua e outra na comparación co inglés. Ao concurso, aberto a profesorado e alumnado de distintos niveis educativos da Comunidade Valenciana, presentáronse 39 pezas audiovisuais.

Fonte: Valencia News

Alcoi converterase en epicentro da reflexión lingüística e cultural esta primavera co ciclo «Parlem de Llengua: Som i Serem», que se desenvolverá entre febreiro e maio. O evento reunirá escritores, mestres, músicos e cidadanía para analizar o presente e futuro do valenciano, combinando literatura, música, xogo e análise sociopolítica. A iniciativa busca fomentar a reflexión crítica e a participación ao redor da lingua e promover a súa identidade cultural como elemento de cohesión social. A programación, que inclúe desde debates ata concertos, contará coa implicación de diversas entidades culturais e educativas locais.

Fonte: Ajuntament d'Alcoi

A Vicepresidencia Segunda da Generalitat Valenciana convoca axudas por importe de 300.000 euros para fomentar o uso do valenciano nos libros das Fallas, Magdalena, Fogueres e Moros i Cristians. As subvencións, distribuídas entre comisións e asociacións festivas, recoñecerán a calidade lingüística, a presenza da lingua propia e o orzamento das publicacións correspondentes a 2026. A medida pretende reforzar o valenciano como vehículo de expresión cultural en celebracións de gran relevancia patrimonial, algunhas delas recoñecidas pola Unesco.

Fonte: Castellón Plaza

En Petrer comeza a terceira edición do programa Voluntariat pel Valencià, unha iniciativa gratuíta de Escola Valenciana que promove a práctica oral sen clases teóricas nin exames. O proxecto pon en contacto persoas que queren gañar fluidez con voluntariado que xa domina a lingua, mediante “parellas lingüísticas”. Cada parella comprométese a se xuntar unha hora á semana durante dez semanas para conversar en valenciano en situacións cotiás, fóra da aula. A proposta, que cumpre vinte anos, pretende incrementar o número de falantes ao facilitaren un uso real e continuado da lingua.

Fonte: Ayuntamiento de Petrer

A segunda entrega do Informe Poblet analiza a evolución do valenciano no ámbito dixital entre 2022 e 2025 e confirma o seu forte avance nas redes sociais. TikTok medra con rapidez e Instagram consolídase como espazo central, cunha crecente profesionalización das persoas creadoras. O estudo salienta a forza do videopódcast e do tecido independente fronte á perda de referentes xuvenís nos medios públicos.

Fonte: El Diario