País Vasco
A Unión de Federacións Deportivas Vascas aposta pola normalización do éuscaro cunha campaña dirixida a persoas adestradoras
A Unión de Federacións Deportivas Vascas reforza a súa estratexia de promoción do éuscaro cunha nova edición de «Gu Geu, Kirola Euskaraz», centrada no papel das persoas adestradoras como referentes lingüísticos. Este ano son xa 23 as federacións adheridas ao acordo co Goberno vasco, que recoñeceu o seu compromiso nun acto en Vitoria-Gasteiz. Ademais de campañas de sensibilización, impúlsanse diagnósticos, plans de lingua e cursos formativos, cada vez máis demandados e con maior presenza do éuscaro. A iniciativa procura consolidar un espazo deportivo inclusivo e euscaldún, no que a mocidade poida usar a lingua con naturalidade e confianza.
Fonte: Gobierno Vasco
Más de 200 vídeos participan no concurso Arnasetik, un certame dirixido á mocidade de localidades onde o éuscaro é maioritario
A iniciativa Arnasa Gara impulsa unha nova edición de Arnasetik, un certame audiovisual dirixido á mocidade de 10 a 16 anos procedente dos arnasguneak, co fin de fortalecer a creatividade e promover unha reflexión arredor dos usos lingüísticos e da realidade sociolingüística destes concellos euscaldúns. A iniciativa, promovida por UEMA e polos gobernos vasco e navarro, busca recoñecer o papel esencial destas comunidades na continuidade do éuscaro.
Fonte: Gobierno Vasco
O Plan estratéxico para o fomento do uso do éuscaro en Áraba comeza a súa andaina
O orzamento da Deputación Foral para 2026 reforza o impulso ao uso do éuscaro cun incremento significativo nos programas de promoción lingüística, centrados na mocidade e no eido socioeconómico, así como o apoio aos medios en nesta lingua e ás principais entidades culturais do territorio.
Fonte: Diputación Foral de Álava
Publícase unha guía de produtos en éuscaro dirixida á poboación infantil
Euskaragida 2025 é unha guía que reúne as últimas novidades en produtos infantís en éuscaro (libros, cómics, xogos, música ou contidos dixitais) organizadas por categorías e por tramos de idade para facilitar a elección das familias. A publicación distribuirase entre o alumnado de infantil e primaria de Donostia grazas á colaboración dos centros educativos, ademais de estar dispoñible en librerías, bibliotecas e espazos culturais.
Fonte: Donostiako Udala
Habilítanse dúas novas vías para acreditar perfís lingüísticos de éuscaro no sector público
O Goberno vasco aprobou dúas novas vías, máis simples e adaptadas á práctica diaria, para acreditar os perfís lingüísticos na administración pública: demostrar o uso efectivo do éuscaro no propio posto e superar o proceso selectivo integramente en éuscaro. Estas opcións súmanse ás xa vixentes e amplían as posibilidades de obtención da acreditación.
Fonte: Gobierno Vasco
O primeiro encontro do proxecto de fomento do éuscaro LANERA reúne 125 axentes municipais e económicos
O Goberno vasco celebrou o primeiro encontro público de LANERA, un proxecto destinado a reforzar a presenza do éuscaro no ámbito socioeconómico. No encontro participaron arredor de 125 representantes municipais e de axencias de desenvolvemento, que coincidiron en destacar o potencial do éuscaro neste sector. A intervención de diversas autoridades locais subliñou a importancia de avanzar cara a unha implantación efectiva da lingua nos espazos produtivos do territorio.
Fonte: Gobierno Vasco
O Goberno vasco lanza dúas convocatorias de axudas para impulsar proxectos de comunicación en éuscaro
O Goberno vasco aprobará dúas convocatorias de axudas destinadas a reforzar proxectos comunicativos en éuscaro, cun investimento total de 804 000 euros. A principal liña, dotada con 554 000 euros, apoiará a consolidación e expansión de publicacións impresas integramente en éuscaro, nunha aposta decidida por fortalecer os medios que utilizan esta lingua.
Fonte: Gobierno Vasco
Unha organización a prol da normalización do éuscaro convoca unha gran mobilización polo futuro desta lingua
A entidade Euskalgintzaren Kontseilua, que agrupa as principais asociacións e axentes que traballan a prol da normalización do éuscaro, convocou unha mobilización masiva en Bilbao o vindeiro 27 de decembro para dar un novo impulso social á lingua vernácula.
Fonte: Mediabask
A promoción do éuscaro nos orzamentos da Deputación de Biscaia aumentará un 4,2 % en 2026
O Departamento de Éuscaro, Cultura e Deportes da Deputación Foral de Biscaia presentou os orzamentos para 2026, que medrarán un 4,2 % respecto ao ano anterior. As prioridades inclúen a reactivación do éuscaro, o fomento da cultura e a promoción do talento local, así como o impulso do deporte en todas as idades.
Fonte: Bizkaia
O Concello de Bilbao impulsa un plan para reforzar o uso do éuscaro na cidade
O Plan Estratéxico AROA 2025-2035 ten como obxectivo fortalecer o uso do éuscaro tanto na Administración como na vida cotiá da cidade. O plan inclúe medidas para mellorar a transmisión familiar do idioma, facilitar novas oportunidades de aprendizaxe, potenciar a expresividade infantil e xuvenil, e fomentar o uso desta lingua no ocio, no deporte e no ámbito socioeconómico.
Fonte: Bilboko Udala
Boletín
Subscríbase ao boletín
