Os catro concellos da comarca puxeron en marcha unha nova campaña para fomentar as actividades deportivas en éuscaro e favorecer que as crianzas empreguen a lingua con naturalidade tamén no lecer. A iniciativa diríxese especialmente ás familias con fillas e fillos de 8 a 12 anos, ás que se anima a solicitar adestramentos e propostas deportivas nesta lingua. Ademais, os concellos apelan aos clubs para que ofrezan actividades en éuscaro e difunden materiais dixitais e vídeos co fin de reforzar hábitos lingüísticos máis alá da escola.

Fonte: Herri Bizia

Otxandio celebrou o Día dos Municipios Euscaldúns, unha xornada organizada por UEMA e o Concello da localidade para reivindicar o papel das zonas con maior presenza do éuscaro na normalización lingüística. A Mancomunidade agrupa actualmente 121 concellos, aínda que a organización lembra que existen arredor de 175 municipios onde máis do 70 % da poboación é euscaldún.

Fonte: Orain

Donostia poñerá en marcha unha nova quenda de Parketarrak, un programa gratuíto de lecer infantil en éuscaro que chegará a dezaoito barrios da cidade entre o 4 e o 22 de maio. A iniciativa propón xogos e actividades para crianzas de 3 a 9 anos e as súas familias, co obxectivo de fomentar o uso da lingua nos parques e espazos de convivencia cotiá. Tras a boa acollida das sesións anteriores, o Concello e as comisións de éuscaro dos barrios reforzan así unha proposta que combina xogo, socialización e transmisión lingüística.

Fonte: Donostiako Udala

O Goberno vasco presentou o Euskara Bonua, un novo sistema que permitirá aprender éuscaro cun único pagamento inicial de 120 euros e durante un período de até catro anos. A medida busca reducir as barreiras económicas e, sobre todo, favorecer que as persoas non só inicien a aprendizaxe, senón que a continúen até acadar unha capacidade real de uso cotián. O modelo implantarase de forma progresiva e pretende substituír a lóxica de cursos illados por itinerarios flexibles e completos.

Fonte: Gobierno Vasco

O Concello de Vitoria-Gasteiz aprobou unha convocatoria de axudas de 199 000 euros para proxectos que promovan o uso do éuscaro, 30 000 máis ca no exercicio anterior. As subvencións diríxense a persoas e entidades privadas que desenvolvan iniciativas nos ámbitos educativo, deportivo, cultural, comunicativo e de lecer. A convocatoria estrutúrase en catro liñas, desde accións de sensibilización en asociacións de familias até proxectos para mudar hábitos lingüísticos, apoio a medios en éuscaro e actividades arredor do Día Internacional do Éuscaro.

Fonte: Ayuntamiento de Vitoria-Gasteiz 

O Goberno vasco destinará até 1,15 millóns de euros en 2026 á formación en éuscaro da Ertzaintza, mediante un acordo entre a Academia Vasca de Policía e Emerxencias e HABE. A iniciativa permitirá impartir cursos para acreditar os perfís lingüísticos 1 e 2, así como formar o alumnado que accede á escala básica da Policía vasca. Con esta colaboración, o executivo busca avanzar na normalización do éuscaro na Administración e garantir unha atención máis próxima e axeitada á realidade sociolingüística de Euskadi.

Fonte: Gobierno Vasco

Euskadi impulsa o proxecto «Adi! Filmak euskaraz» para ampliar a presenza do éuscaro no audiovisual e incorporalo con máis forza aos hábitos de lecer da cidadanía. A iniciativa permitirá duplicar os filmes nesta lingua nas salas, con 24 estreas anuais, das cales doce serán grandes producións internacionais, e reforzará tamén a oferta en plataformas dixitais mediante dobraxe e subtitulación. Ademais, Kulturklik incorporará un espazo específico para localizar contidos dispoñibles en éuscaro. O proxecto, desenvolvido con axentes do sector, busca que familias, infancia e mocidade poidan vivir a lingua con naturalidade tamén no consumo cultural.

Fonte: Gobierno Vasco 

O Concello de Donostia-San Sebastián publicou, a través do Servizo de Éuscaro, un dicionario castelán-éuscaro pensado para o persoal da hostalería, co obxectivo de facilitar o uso de palabras e expresións básicas nesta lingua no trato coa clientela. A ferramenta, organizada en seis apartados prácticos, procura achegar especialmente o éuscaro ás persoas migrantes que traballan no sector. Ademais, o servizo municipal visitará 300 locais entre abril e maio para presentar este recurso e informar das axudas dispoñibles.

Fonte: Donostiako Udala

O Concello de Vitoria-Gasteiz impulsará unha nova análise sobre a presenza do éuscaro no lecer extraescolar, co propósito de coñecer como evolucionou a situación nos últimos cinco anos e detectar novas vías de intervención. A decisión parte da utilidade que tivo o estudo encargado en 2021, realizado nun contexto aínda marcado pola pandemia, para comprender mellor a realidade lingüística neste ámbito. Con esta actualización, o municipio pretende afinar o diagnóstico e reforzar as actuacións orientadas a incrementar o uso do éuscaro entre a poboación máis nova.

Fonte: Ayuntamiento de Vitoria-Gasteiz

EITB reforzará desde a semana do 13 de abril a oferta infantil en éuscaro en aberto ao duplicar o sinal de ETB1 ON, que emitirá por TDT doce horas continuadas de contidos de Makusi entre as 07.00 e as 19.00. A corporación pública prevé crear un foro estable de diálogo con axentes vinculados á lingua para compartir estratexias arredor da dixitalización e do impulso do audiovisual en éuscaro.

Fonte: EITB