A Mancomunidade de Durangaldea impulsa unha nova edición do concurso Gurot, destinado á mocidade de 12 a 18 anos para fomentar o uso do éuscaro dun xeito lúdico e educativo. Este ano o certame preséntase en formato de microconcursos individuais, que se celebrarán os xoves de novembro.

Fonte: Durangoko Udala

A asociación Pantailak Euskaraz alertou no Parlamento Vasco da escasísima presenza do éuscaro no cinema e nas plataformas de streaming, onde apenas o 1 % das proxeccións e contidos están nesta lingua. A entidade considera que esta situación prexudica o uso e a calidade do idioma entre a mocidade e reclama máis recursos para producións propias e dobraxes, un marco legal específico e a creación dun consello audiovisual vasco. Tamén propón campañas institucionais que animen a consumir contido en éuscaro e visibilicen os novos subtitulados e dobrados. 

Fonte: El Diario

A asociación de farmacéuticos euscaldúns (FEUSE) celebra o seu 30 aniversario na Facultade de Farmacia da Universidade do País Vasco coa xornada «Asteazken Kulturala». O acto combinará a presentación da traxectoria da asociación, unha charla sobre intelixencia artificial aplicada á sanidade e unha mesa redonda sobre a relevancia do éuscaro no ámbito farmacéutico. O obxectivo é reforzar o compromiso coa lingua e a profesión, achegar a asociación ao alumnado e fomentar a participación interxeracional dos profesionais euscaldúns.

Fonte: Zaragoza 24

O Consello de Goberno aprobou convenios de colaboración entre o Instituto Vasco de Administración Pública (IVAP) e as Xuntas Xerais de Áraba, así como co Concello de Igorre, para fortalecer a formación e normalización do éuscaro no sector público. Estes acordos permitirán ofrecer cursos de euscaldunización e alfabetización lingüística ao persoal público, facilitando a súa participación e mellorando a capacitación nesta lingua.

Fonte: Gobierno Vasco

EITB incorpora á súa programación o espazo Ingura, que constará de vídeos para facilitar a aprendizaxe do éuscaro a persoas adultas con contidos de niveis A1 e A2. O formato combina dramatizacións curtas de situacións cotiás con vídeos explicativos presentados por coñecidas persoas da comunicación vasca.

Fonte: EITB

O programa cultural ISPILU(h)ARI ten como obxectivo de promover o uso do éuscaro e fortalecer a identidade cultural local. As actividades, que se celebrarán o terceiro fin de semana de cada mes, abranguen teatro, música, poesía e danza, e están dirixidas a todas as idades. O programa busca crear un espazo de encontro, creatividade e participación cidadá e ofrecer a oportunidade de gozar, aprender e vivir a cultura vasca de maneira inclusiva e artística.

Fonte: Debako Udala

Orai presentou Kimu, un chatbot en éuscaro deseñado para asistir empresas e institucións en diversas tarefas, como traducións, resumos, extracción de información ou corrección de textos, mantendo a privacidade ao poder instalarse localmente.

Fonte: Estrategia

Os concellos de Oarsoaldea (Errenteria, Lezo, Oiartzun e Pasaia) presentaron en marzo un proxecto para promover o uso do éuscaro nos clubs deportivos da comarca co obxectivo de que cada club, partindo da súa realidade, desenvolva unha xestión lingüística adecuada. Agora, a nova marca do proxecto, que leva o nome Aktibatuz!, conta coa colaboración dos departamentos de deportes e de éuscaro dos concellos, así como das federacións de balonmán e fútbol. Desde abril, os clubs crearon unha “mesa do deporte” para diagnosticar a situación e, a partir de outubro, empezarán a elaborar plans específicos para cada un.

Fonte: Lezoko Udala

O Consello de Goberno aprobou unha orde para convocar axudas á produción de materiais didácticos en éuscaro para niveis educativos non universitarios, cun importe de 985 000 euros. O obxectivo desta convocatoria é apoiar a creación de materiais adaptados á normativa curricular en diferentes modalidades, incluíndo materiais impresos e dixitais.

Fonte: Gobierno Vasco

O Servizo de Éuscaro organiza unha nova edición de Parketarrak, iniciativa que promove o uso do éuscaro en 22 parques e zonas de xogo de 19 barrios da cidade entre o 6 e o 24 de outubro. As actividades, gratuítas e dinamizadas con música, diríxense a dúas franxas de idade: Zabu-zibu (3-5 anos) e Txirrintxon (6-9 anos). O programa busca que as familias utilicen o éuscaro de maneira natural no lecer, reforzando o seu uso social e favorecendo amizades nesta lingua.

Fonte: Donostiako Udala