País Vasco
Convócanse axudas para financiar a totalidade dos gastos de dobraxe ao éuscaro de películas
Zineuskadi, a iniciativa de promoción do cine vasco, organiza unha nova edición do programa Zinema Euskaraz 2023, co obxectivo de promover estreas comerciais de cinema en éuscaro.
Fonte: Audiovisual451
O Concello de Bilbao organiza un programa de lecer familiar en éuscaro
O programa «Ikusi eta Ikasi » chega á súa 19ª edición, que se desenvolverá entre o 16 de xaneiro e o 26 de maio nos diferentes barrios da cidade, co obxectivo de crear espazos de lecer familiar en éuscaro e contribuír así a normalizar o uso desta lingua.
Fonte: Ayuntamiento de Bilbao
O Goberno vasco rebaixa os criterios para a obtención por parte das empresas dos certificados de éuscaro
O Executivo vasco decidiu rebaixar os criterios e os procedementos para a obtención do certificado Bikain de xestión do éuscaro, xa que, dende a súa creación, no ano 2007, só 400 entidades lograron esta acreditación lingüística.
Fonte: El Independiente
Unha nova medición do uso do éuscaro en Errenteria mostra que a situación no período 2011-2021 apenas mudou
A última medición realizouse en 2021 e mostra que o uso do éuscaro en Errenteria é do 10,9 %; do español, 86,4 %; do francés, 0,1 %; e doutros idiomas, 2,7 %. Segundo estes datos, a situación é moi semellante á de 2011.
Fonte: Herri Bizia
Galdakao loce un mural para fomentar o uso do éuscaro
Co lema «Euskara, bihotzetik ahora» (O éuscaro do corazón á boca), un mural urbano na rúa Bizkai de Galdakao ten como obxectivo impulsar o uso do éuscaro na vida diaria.
Fonte: Deia
O Tribunal Superior de Xustiza do País Vasco rexeita que a Administración lle esixa a unha subcontrata saber éuscaro
Segundo o TSXPV, a Administración local non pode impoñer as esixencias de éuscaro do funcionariado ao persoal das subcontratas que lles presten servizos. Dálle así a razón a CC. OO. e anula o punto do perfil lingüístico dun prego de condicións técnicas dun contrato a unha empresa privada do Concello de Barakaldo.
Fonte: NIUS
Preséntase o sitio web Neoloteka, un arquivo de neoloxismos en éuscaro
O centro de terminoloxía e lexicografía Uzei presentou Neoloteka, un sitio web de neoloxismos en éuscaro no que se recollerán novas palabras e locucións nesta lingua que se irá actualizando continuamente con novas entradas.
Fonte: EITB
O Concello de Elgoibar presenta o mapa da pluralidade lingüística do municipio
O Concello de Elgoibar, coa colaboración do Clúster de Sociolingüística, realizou un estudo co que se recoñecen todas as linguas que se falan no municipio e se afonda na convivencia lingüística, poñendo o éuscaro no centro.
Fonte: Noticias de Gipuzkoa
As academias de éuscaro de Vitoria-Gasteiz reciben axudas para apoiar o seu labor educacional
O Concello de Vitoria-Gasteiz apoia os euskaltegis homologados por HABE cunha convocatoria de axudas de 75 000 euros, distribuída en proporción ao número de horas impartidas durante o curso 2021/2022.
Fonte: Noticias de Álava
Unha sondaxe revela que a maioría da poboación vasca quere escoller o idioma no que se dirixe á Administración
O Goberno vasco leva a cabo unha sondaxe sobre o éuscaro, a través de 1200 entrevistas telefónicas, e determina que o 95 % da poboación vasca considera que a Administración debería atender sempre no idioma que elixa a cidadanía e que o 90 % pensa que as empresas e entidades privadas tamén deberían atender a súa clientela do mesmo modo.
Fonte: Deia
Boletín
Subscríbase ao boletín
