O Grupo Fagor e as súas cooperativas comprométense a participar na nova edición do Euskaraldia, que terá lugar do 15 ao 25 de maio, co obxectivo de reforzar os hábitos lingüísticos en éuscaro. Ademais de informar e visibilizar a iniciativa, buscarán medidas concretas para promover o uso do idioma no ámbito cooperativo.

Fonte: TuLankide

EITB e Euskaltzaindia asinaron un acordo de colaboración para o período 2025-2028 co obxectivo de promover a normalización do éuscaro nos medios, fortalecer o seu modelo estándar e preservar a diversidade dialectal. Entre as iniciativas, recollerase a produción lingüística de EITB no Corpus de Referencia do Éuscaro e a promoción do seu uso na intelixencia artificial. Ademais, impulsaranse accións formativas e proxectos enfocados na mocidade para garantir a transmisión do idioma mediante novas plataformas dixitais. Ambas as institucións destacan a colaboración como clave para a modernización e revitalización do éuscaro.

Fonte: EITB

O programa Parketarrak desenvolverase do 3 ao 21 de marzo en 22 parques de Donostia para promover o uso do éuscaro no lecer infantil. A iniciativa está dirixida á rapazada de 3 a 9 anos e estrutúrase en dous grupos segundo a idade. A través do xogo, reforzase a aprendizaxe da lingua e foméntase o seu uso en contornos sociais e familiares.

Fonte:  Donostiako Udala

Constitúese en Vitoria-Gasteiz a Comisión de Coordinación das Administracións Públicas (HAKOBA) co obxectivo de reforzar a colaboración entre as entidades públicas vascas na normalización lingüística. As súas funcións céntranse na coordinación institucional e na identificación de accións prioritarias neste ámbito. No encontro participan representantes do Goberno vasco, das deputacións forais, das tres capitais vascas, así como de EUDEL e UEMA.

Fonte: Gobierno Vasco

O programa Bizkaian Bagara, promovido pola Deputación Foral de Bizkaia e Taupa Euskaltzaleen Mugimendua, busca impulsar o uso do éuscaro mediante accións comunitarias en 30 municipios e 12 comarcas. Con iniciativas destinadas á mocidade, ás familias e á integración lingüística, pretende transformar hábitos e ampliar oportunidades para vivir en éuscaro. O obxectivo é chegar a 10.000 persoas nos próximos tres anos mediante 49 intervencións.

Fonte: Diputación Foral Bizkaia

O Goberno vasco presentou Euskorpus, un proxecto estratéxico para fortalecer a presenza do éuscaro no ámbito dixital mediante a intelixencia artificial e as tecnoloxías da lingua. Cun orzamento inicial de 5,55 millóns de euros, a iniciativa busca desenvolver un corpus dixital que permita a integración do éuscaro en dispositivos e asistentes virtuais. A asociación Euskorpora liderará a súa execución en tres fases, que se centrarán na planificación, a compilación de recursos lingüísticos e a súa transferencia ao tecido industrial e social.

Fonte: Gobierno Vasco

Está aberta a convocatoria de 2025 da Bolsa Xabier Lete para a creación literaria en éuscaro, impulsada polo Goberno vasco e a Fundación BBVA. Dirixida a escritoras e escritores en proceso de consolidación, ofrece 70 000 euros para dedicarse durante un ano ao seu proxecto co obxectivo de fomentar o talento literario e a creación nesta lingua.

Fonte: Gobierno Vasco

O Concello de Durango reforza o seu compromiso coa promoción do éuscaro mediante unha reorganización estratéxica que o converte nun eixe transversal das políticas municipais. A nova estrutura integra a lingua en educación, cultura, deporte e mocidade para asegurar a súa consolidación e créase unha figura de coordinador técnico que se responsabilizará do éuscaro.

Fonte: Durangoko Udala

O Concello de Bilbao abre o prazo de inscrición para unha nova edición de Harrapazank, un programa de lecer xuvenil en éuscaro dirixido a menores de 10 a 16 anos. O obxectivo é promover o uso da lingua nun ambiente lúdico, integrando valores como a igualdade, a inclusión e a diversidade.

Fonte: Bilboko Udala

EITB lanza Guau, unha plataforma gratuíta de audio que recolle contidos en éuscaro, incluíndo radio en directo, programas a demanda, podcasts e audiolibros. O seu obxectivo é fortalecer o ecosistema vasco de audio e garantir a presenza do éuscaro nos novos formatos de consumo. Guau integra as emisoras de EITB e máis de 150 podcasts e irá ampliando progresivamente o seu catálogo.

Fonte: Panorama Audiovisual