País Vasco
A Real Academia da Lingua Vasca actualiza o seu dicionario con 795 novas formas
O dicionario da Real Academia da Lingua Vasca (Euskaltzaindia) incorporou 795 novas formas en éuscaro, con termos culinarios como ajoarriero, guakamole e entsalada errusiar, e conceptos modernos como reggaeton ou ziborg. Desde 2016, as actualizacións son semestrais e nelas revísanse e mellóranse as entradas existentes. O traballo recente incluíu revisións baseadas en corpus especializados e un novo buscador para facilitar consultas. O dicionario conta agora con 51 407 formas e 69 364 acepcións.
Fonte: El Diario
O Goberno vasco e Euskaltzaindia colaborarán en programas para o impulso do éuscaro
O Departamento de Educación do Goberno vasco e Euskaltzaindia reforzan a súa colaboración para impulsar o éuscaro mediante o programa EIMA, destinado á creación e difusión de materiais didácticos nesta lingua. O acordo inclúe a aplicación das normas de Euskaltzaindia, a coordinación de iniciativas e a promoción dun sistema educativo plurilingüe centrado no éuscaro.
Fonte: Gobierno Vasco
O Concello de Bilbao organiza un ano máis Ikusi eta Ikasi, o programa de lecer familiar en éuscaro
O Concello de Bilbao impulsa unha nova edición de Ikusi eta Ikasi, programa de lecer familiar en éuscaro que celebra 22 anos de actividade. Con 64 propostas para menores de 2 a 11 anos, inclúe sesións específicas para os máis pequenos e as súas familias. A inscrición está aberta do 13 ao 27 de xaneiro na web oficial do programa.
Fonte: Bilboko Udala
Vitoria acolle unha exposición sobre as variedades locais do éuscaro
O centro cívico de Zabalgana acolle a exposición interactiva «Euskara ibiltaria», que explora a diversidade da lingua vasca a través do Atlas das Variedades Locais do Éuscaro. Esta mostra busca divulgar o valor cultural da lingua e permitir unha experiencia sensorial para coñecer as súas variantes dialectais. Inclúe mapas, xogos e audios que revelan a riqueza léxica e morfolóxica do idioma, resultado de entrevistas realizadas entre 1987 e 1992 en 145 localidades.
O Concello de Pasaia convoca axudas para o fomento do éuscaro en empresas e comercios
Xa está aberto o prazo de solicitude de subvencións para actividades de promoción do éuscaro que se prolongará ata o 19 de xaneiro. A convocatoria ten como obxectivo a concesión de axudas para o deseño e seguimento de plans de éuscaro nas empresas, a colocación de rótulos nesta lingua e a adaptación de imaxes corporativas, páxinas web e programas informáticos a esta lingua.
Fonte: Pasaiako Udala
O Goberno vasco destaca que a asunción da competencia de cinematografía lle dá maior marxe para apoiar o cine en éuscaro
O Goberno vasco comeza a xestionar a cinematografía desde o 1 de xaneiro, logo de recibir a competencia do Estado. Esta transferencia permite mellorar a tramitación de axudas e recursos para o cine en éuscaro, o que lle dá máis marxe para apoiar esta industria.
Fonte: Infobae
Os mozos vascos usan máis o éuscaro que o castelán no traballo
Segundo un informe, o 58 % da mocidade vasca empregan o éuscaro no traballo, fronte ao 47 % que usan o castelán. O estudo destaca a importancia da lingua no ámbito laboral entre as xeracións máis novas.
Fonte: Norte Expres
O Goberno vasco prorroga o convenio para financiar cursos de éuscaro dirixidos a persoas inmigrantes
O Goberno vasco decidiu prorrogar o convenio co instituto HABE para financiar cursos de acollida en éuscaro dirixidos a persoas inmigrantes maiores de 16 anos cun investimento de 70 000 euros. Estes cursos, incluídos no VI Plan intercultural sobre inmigración e asilo, buscan promover o uso do éuscaro como clave para a integración social, o acceso ao mercado laboral e a interacción comunitaria das persoas de orixe estranxeira.
Fonte: Gobierno Vasco
Tolosa aproba o seu Plan estratéxico de política lingüística
O Plan estratéxico de política lingüística de Tolosa 2025-2034 establece unha folla de ruta ambiciosa para fortalecer o uso do éuscaro na localidade, con 160 iniciativas baseadas en cinco eixes: gobernanza, actitude, coñecemento, uso e investigación. O plan busca incrementar a transmisión do éuscaro, promover o seu uso cotián, mellorar a formación e a acollida lingüística e reforzar o prestixio cultural. Desenvolvido de forma colaborativa, responde aos cambios demográficos e sociais previstos para asegurar a continuidade e a adaptación ás necesidades futuras.
Fonte: Debako Udala
O Tribunal Superior de Xustiza do País Vasco suspende cautelarmente unhas oposicións polo nivel de éuscaro esixido
O Tribunal Superior de Xustiza do País Vasco suspendeu de forma cautelar as oposicións a secretario-interventor da Administración local, convocadas polo Goberno vasco, debido ao requisito de acreditar o coñecemento de éuscaro. O Consello de Colexios de Secretarios e Interventores argumentou que esta esixencia vulnera a normativa estatal de habilitación nacional e os principios de acceso á función pública, ao non considerarse como mérito.
Fonte: EITB
Boletín
Subscríbase ao boletín
