O centro Orai NLP desenvolveu, en colaboración con varias entidades educativas e sociais, un sistema de ditado en éuscaro adaptado ás voces infantís, grazas ás gravacións de case 500 escolares. A ferramenta AskHezi, baseada en redes neuronais, permite transcribir a voz en éuscaro e será especialmente útil para alumnado con discapacidade motora. O proxecto, nacido a petición das familias, busca garantir a aprendizaxe inclusiva da lingua e conta xa cunha plataforma plenamente operativa.

Fonte: EITB

A SD Eibar presentou o primeiro dicionario de fútbol español-éuscaro, co obxectivo de promover o uso da lingua vasca no ámbito deportivo e achegala á mocidade. A iniciativa, que nace do proxecto Euskararen Baloia, inclúe traducións de termos futbolísticos e expresións comúns, e está dirixida tanto a xogadoras e xogadores como ao público. O dicionario repartirase no estadio e poderá descargarse mediante código QR. O club reafirma así o seu compromiso coa normalización lingüística a través do deporte.

Fonte: SD Eibar

Desde outubro de 2023, Errenteria desenvolve novas metodoloxías para achegar o éuscaro á cidadanía mediante o proxecto Uler Saioak, que xa formou 28 persoas en comprensión oral. Ademais, púxose en marcha Ulerrizketak, un programa que facilita interaccións en éuscaro cunha persoa de confianza para consolidar a aprendizaxe.

Fonte: Ayuntamiento de Errenteria

O Concello de Irún puxo en marcha o Mes do Éuscaro para fomentar o uso desta lingua cun programa que inclúe tres actividades: representacións teatrais para o alumnado no Centro Cultural Amaia, publicación dos seus traballos na revista Irunero e a celebración do Mintzodromo Gaztea no Espazo Palmera Montero.

Fonte: Ayuntamiento de Irún

En Tolosaldea, os municipios e axentes sociais iniciaron a campaña ‘Abizenak ere euskaraz’ para cambiar a grafía dos apelidos ao éuscaro en documentos oficiais. A modificación, que require un proceso administrativo sinxelo, busca avanzar na normalización do idioma e fomentar o seu uso nas administracións.

Fonte: Tolosako Udala

O colectivo Pantailak Euskaraz e o Observatorio de Dereitos Lingüísticos denuncian que só o 1,6 % das proxeccións cinematográficas de 2024 en Euskal Herria foron en éuscaro. Ante esta situación, reclámanlles ás institucións públicas a adopción de normativas que garantan a presenza do idioma nos cines e un incremento dos recursos para produción, dobraxe e subtitulación.

Fonte: EITB

O Grupo Fagor e as súas cooperativas comprométense a participar na nova edición do Euskaraldia, que terá lugar do 15 ao 25 de maio, co obxectivo de reforzar os hábitos lingüísticos en éuscaro. Ademais de informar e visibilizar a iniciativa, buscarán medidas concretas para promover o uso do idioma no ámbito cooperativo.

Fonte: TuLankide

EITB e Euskaltzaindia asinaron un acordo de colaboración para o período 2025-2028 co obxectivo de promover a normalización do éuscaro nos medios, fortalecer o seu modelo estándar e preservar a diversidade dialectal. Entre as iniciativas, recollerase a produción lingüística de EITB no Corpus de Referencia do Éuscaro e a promoción do seu uso na intelixencia artificial. Ademais, impulsaranse accións formativas e proxectos enfocados na mocidade para garantir a transmisión do idioma mediante novas plataformas dixitais. Ambas as institucións destacan a colaboración como clave para a modernización e revitalización do éuscaro.

Fonte: EITB

O programa Parketarrak desenvolverase do 3 ao 21 de marzo en 22 parques de Donostia para promover o uso do éuscaro no lecer infantil. A iniciativa está dirixida á rapazada de 3 a 9 anos e estrutúrase en dous grupos segundo a idade. A través do xogo, reforzase a aprendizaxe da lingua e foméntase o seu uso en contornos sociais e familiares.

Fonte:  Donostiako Udala

Constitúese en Vitoria-Gasteiz a Comisión de Coordinación das Administracións Públicas (HAKOBA) co obxectivo de reforzar a colaboración entre as entidades públicas vascas na normalización lingüística. As súas funcións céntranse na coordinación institucional e na identificación de accións prioritarias neste ámbito. No encontro participan representantes do Goberno vasco, das deputacións forais, das tres capitais vascas, así como de EUDEL e UEMA.

Fonte: Gobierno Vasco