País Vasco
O Concello de Durango aproba o seu plan de fomento do éuscaro
O Concello de Durango aprobou o Plan de Acción para o Fomento do Éuscaro AROA 2025-2028, cun total de 140 accións distribuídas en sete grandes eixes, entre os que se inclúen gobernanza, motivación, coñecemento, uso e innovación. O plan busca promover o uso desta lingua en ámbitos como o deporte, o comercio, a educación e a integración das persoas inmigrantes, e fomentar así a cohesión social e a diversidade lingüística.
Fonte: Durangoko Udala
A Deputación Foral de Áraba destina 190 000 euros ao fomento da socialización en éuscaro
A Deputación Foral de Áraba destinará 190 000 euros a 38 concellos e 5 cuadrillas para apoiar 124 proxectos que promovan a socialización en éuscaro. As axudas abarcan actividades de lecer, deporte, cultura e xuventude, así como iniciativas nos euskaltegis, co obxectivo de fortalecer o uso e a transmisión desta lingua. Estes programas buscan crear condicións para garantir oportunidades de vivir en éuscaro en todo o territorio histórico.
Fonte: Radio Llodio
A comunidade eusGara amplía a súa rede a 33 empresas para promover o uso do éuscaro no ámbito socioeconómico de Arratia
A comunidade eusGara, composta por 33 empresas, continúa crecendo e promovendo o uso do éuscaro no ámbito laboral de Arratia. Este ano, catro novas entidades comprometéronse a incrementar o uso da lingua grazas ao apoio do servizo lingüístico gratuíto ofrecido pola fundación Errota, coa colaboración das administracións locais, a Deputación Foral de Biscaia e o Goberno vasco. O proxecto destaca o valor do éuscaro como elemento de competitividade empresarial e identidade cultural.
Fonte: Gobierno Vasco
Entréganse os premios Lazarraga a entidades que destacan polo seu compromiso co éuscaro
Os premios Lazarraga 2024 recoñeceron a cinco entidades arabesas polo seu compromiso co uso do éuscaro no ámbito socioeconómico: Grafik Sarea, Sartu Álava, Elkar San Prudencio, Hyundai Eska e Jimmy Jazz. Durante o acto de entrega dos galardóns, representantes da Asociación Bai Euskarari e da Deputación Foral destacaron a necesidade de promover o éuscaro no mundo laboral, sinalando que a súa presenza resulta estratéxica para preservar o investimento en educación e fomentar a inclusión da mocidade.
Fonte: Diputación Foral de Álava
Eibar organiza actividades de sensibilización sobre a importancia do uso do éuscaro no deporte
Akebai organizou sesións de sensibilización sobre a importancia do éuscaro no deporte, nas que participaron máis de 50 adestradoras e adestradores, así como alumnado de Ensinanza e Animación Social e Deportiva da Uni Eibar-Ermua. Nas formacións abordáronse exemplos e recomendacións para normalizar o uso do idioma nas actividades deportivas.
Fonte: Eibarko Udala
O Goberno vasco e o Instituto da Cinematografía e das Arte Audiovisuais asinan un convenio para impulsar as producións en éuscaro
O Goberno vasco e o ICAA asinaron un convenio para impulsar a produción, distribución e exhibición do audiovisual en éuscaro, con transferencia de máis dun millón de euros. Este fondo vincúlase á convocatoria de axudas do Departamento de Cultura, que aumentou significativamente a súa dotación para apoiar obras innovadoras e internacionais, incluíndo series en éuscaro. O acordo culmina as negociacións iniciadas en 2019 para reforzar o sector audiovisual na lingua propia.
Fonte: Gobierno Vasco
Biscaia incrementa o orzamento para o fomento do éuscaro
A Deputación Foral de Biscaia presentou un orzamento de 67,58 millóns de euros para o departamento de Éuscaro, Cultura e Deportes, que supón un incremento do 2,13 % para o 2025. Entre as prioridades figura fomentar o uso do éuscaro polo que se destinarán á normalización desta lingua 8,48 millóns.
Fonte: Radio Popular
A Universidade do País Vasco realiza unha investigación en Durango sobre a relación entre o éuscaro e a cognición na terceira idade
A Universidade do País Vasco iniciou en Durango un estudo pioneiro para investigar como o uso do éuscaro e o bilingüismo inflúen nas capacidades cognitivas das persoas maiores de 60 anos durante o envellecemento. A investigación, que conta co apoio do Concello de Durango e da asociación Berbaro, incluirá probas cognitivas e actividades lingüísticas. As persoas participantes recibirán unha compensación económica pola súa colaboración co que se contribuirá á promoción dun envellecemento activo e saudable.
Fonte: Durangoko Udala
O éuscaro será requisito nunha cota das vacantes da Administración de Xustiza
O Congreso acordou reservar prazas específicas na Administración de Xustiza do País Vasco nas que o éuscaro será un requisito, co obxectivo de reducir a temporalidade ata un 8 % nestes postos, o que permitirá exixir un nivel de coñecemento nesta lingua nas prazas singularizadas por razón de idioma. Esta medida mellorará a atención á cidadanía vasca e garantirá o dereito de expresarse en éuscaro.
Fonte: Siglo XXI
EiTB verá reforzado o seu papel como referente da información en éuscaro
O Goberno vasco incrementará o seu orzamento de cultura en 2025 para impulsar o uso do éuscaro. Entre as partidas principais, destinaranse 119,7 millóns a EiTB para consolidala como referente informativo nesta lingua e promoverase a súa aprendizaxe gratuíta en todos os niveis.
Fonte: El Diario
Boletín
Subscríbase ao boletín
