País Vasco
Convócase a terceira edición do concurso Arnasetik dirixido a que a mocidade euscalduna reflexione sobre os seus hábitos lingüísticos
A iniciativa Arnasa Gara organiza, por terceiro ano, o concurso de videocreación ARNASETIK, dirixido a mozos e mozas de entre 10 e 16 anos co obxectivo de fomentar a creatividade e reflexionar sobre os hábitos lingüísticos a través de vídeos de dous minutos. Divídese en tres categorías, segundo as idades, e cada unha presenta un reto específico. O concurso entregará premios de ata 2000 euros e estará aberto ata o 31 de outubro.
Fonte: Gobierno Vasco
O Concello de Barakaldo convoca axudas á rotulación en éuscaro para comercio, hostalería e sector servizos
O Concello de Barakaldo lanza unha nova convocatoria de axudas á rotulación en éuscaro para comercios, hostalaría e servizos á que destinará unha partida de 5000 euros destinada a financiar ata un 50 % ou 25 % dos gastos de instalación dos rótulos nesta lingua.
Fonte: Radio Nervión
O Goberno vasco presenta as prioridades en relación co éuscaro do Departamento de Cultura e Política Lingüística
A vicelehendakari primeira, Ibone Bengoetxea, expuxo no Parlamento vasco os retos do seu departamento en materia de política lingüística para os próximos catro anos. Entre os obxectivos destacan o fomento do uso social do éuscaro, que deberá integrarse en todas as políticas; o avance na gratuidade para a súa aprendizaxe; a oficialidade en Europa; e o incremento da súa utilización nas actividades extraescolares, no ámbito dixital e no laboral.
Fonte: Gobierno Vasco
O Goberno vasco destina case 8 millóns de euros para subvencionar a aprendizaxe do éuscaro
A vicelehendakari Ibone Bengoetxea presentou a campaña de matriculación nos euskaltegis para o curso 2024-2025, destacando as facilidades económicas dispoñibles para impulsar a aprendizaxe do éuscaro. O programa ofrece axudas para todos os niveis de formación, con especial apoio para a poboación inmigrante e a xuventude. A vicelehendakari subliñou a importancia do éuscaro como elemento de cohesión social e animou a toda a sociedade a aproveitar esta oportunidade para aprender o idioma. O número de estudantes beneficiarios das subvencións segue en aumento, o que confirma o éxito desta iniciativa.
Fonte: Gobierno Vasco
Desenvolven un novo modelo neuronal para a intelixencia artificial en éuscaro
Orai NLP Teknologiak desenvolveu Llama-eus-8B, un modelo neuronal deseñado para mellorar o uso da intelixencia artificial en éuscaro que permite tarefas como a corrección gramatical, a xeración de contidos e a tradución automática. Baseado no modelo Llama3.1-8B de Meta, utiliza un corpus en éuscaro chamado ZelaiHandi, combinado con textos en inglés para transferir capacidades lingüísticas entre ambas linguas. Este proxecto representa un avance significativo para a intelixencia artificial en linguas con poucos recursos.
Fonte: Estrategia
O Concello de Bilbao pon en marcha unha campaña para animar a cidadanía a aprender éuscaro nos euskaltegis locais
A campaña «Euskara Nonahi-Euskera en cualquier parte» ten como obxectivo impulsar a matriculación nos euskaltegis locais este curso e defende o uso do éuscaro en calquera espazo e situación.
Fonte: Ayuntamiento de Bilbao
A Escola Superior de Arte Dramática de Euskadi reforzará o éuscaro no seu proxecto educativo
O novo proxecto educativo da Escola Superior de Arte Dramática e Danza de Euskadi, Dantzerti, reforzará o éuscaro ao longo deste novo curso académico.
Fonte: Europa Press
Ofertan cursos de éuscaro para familias que queiran aprendelo
O Concello guipuscoano de Elgoibar ofertará cursos para nais e pais que queiran iniciarse na aprendizaxe da lingua vernácula.
Fonte: El Diario Vasco
O Tribunal Superior de Xustiza do País Vasco rexeita a obrigatoriedade do éuscaro como requisito para ser policía municipal
O Tribunal Superior de Xustiza do País Vasco rexeitou a obrigatoriedade de falar éuscaro como requisito para acceder á bolsa de traballo de policías municipais creada en 2021, ao consideralo discriminatorio. A sentenza confirma unha resolución previa que indicaba que non é necesario que todos os axentes coñezan o idioma para garantir os dereitos lingüísticos dos falantes de éuscaro, senón que abonda con que un dos axentes o domine.
Fonte: EITB
O Concello de Vitoria-Gasteiz e a Deputación Foral colaboran para facilitarlle ao alumnado o acceso aos cursos de éuscaro
O Concello de Vitoria-Gasteiz abriu o prazo para inscribirse nos cursos de éuscaro para o curso 2024-2025, nos que ofrece 900 prazas para diversos colectivos como pais e nais, maiores de 55 anos, persoas estranxeiras e traballadores de comercio e hostalería.
Fonte: Diputación Foral de Álava
Boletín
Subscríbase ao boletín
